ការប្រឡងសញ្ញាបត្រមធ្យមសិក្សាទុតិយភូមិ ត្រូវបានរៀបចំឡើងជារៀងរាល់ឆ្នាំ សម្រាប់ការបញ្ចប់ការសិក្សាថ្នាក់វិទ្យាល័យរបស់សិស្សានុសិស្ស មុនពេលឈានជើងចូលថ្នាក់មហាវិទ្យាល័យ ដែលជាវិថីដ៏ធំទូលាយ សម្រាប់ការចាប់យកនូវជំនាញវិជ្ជាជីវៈ។
សម្រាប់សិស្សដែលបានប្រឡងទាំងអស់ ត្រូវបានកំណត់លទ្ធផលជានិទ្ទេស A,B,C,D,E និង F (សម្រាប់សម្គាល់អ្នកមិនជាប់) ទៅតាមលំដាប់ពិន្ទុដែលពួកគេប្រឡងបាន។ តាំងពីមានការប្រឡងមក រៀងរាល់ឆ្នាំ ចំនួនសិស្សដែលជាប់និទ្ទេស A មានតិច មានច្រើន ខុសៗគ្នា។
យ៉ាងណាមិញបើរាប់ចាប់តាំងពីឆ្នាំដែលមានកំណែទម្រង់លើការរឹតបន្តឹងការប្រឡងមក ពោលគឺឆ្នាំ២០១៤ បានបង្ហាញឱ្យឃើញថា ឆ្នាំដែលមានសិស្សប្រឡងជាប់និទ្ទេស A តិចបំផុតគឺនៅឆ្នាំ២០១៤ ដែលមានចំនួន 11នាក់ ទូទាំងប្រទេស។ ដោយឡែកកាលពីឆ្នាំ២០២០ មិនមានចំនួនសិស្សនិទ្ទេស A ឡើយ ព្រោះតែមានការជាប់ដោយស្វ័យប្រវត្តិមិនមានកំណត់និទ្ទេសឡើយ ព្រោះពេលនោះស្ថិតក្នុងបញ្ហារាតត្បាតនៃជំងឺ កូវីដ-១៩។
គួរជម្រាបផងដែរថា ការប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំ ២០២៥ នេះ ត្រូវប្រព្រឹត្តទៅនៅថ្ងៃទី២៨ និងទី២៩ ខែសីហា ឆ្នាំ២០២៥ នេះហើយ៕
