តើកម្មវិធី Live Teaching 2026 មានអ្វីពិសេសខ្លះ?

• កាត់បន្ថយគម្លាតចំណេះដឹង៖ សិស្សនៅតាមខេត្តឆ្ងាយៗ ឬតំបន់ដាច់ស្រយាល អាចរៀនផ្ទាល់តាមអនឡាញជាមួយគ្រូឧទ្ទេសល្បីៗដែលមានបទពិសោធន៍ខ្ពស់ មិនចាញ់សិស្សនៅភ្នំពេញឡើយ។

• ត្រៀមប្រឡងបាក់ឌុប៖ កម្មវិធីនេះផ្ដោតសំខាន់លើការបង្រៀនបំប៉នសិស្សថ្នាក់ទី១២ ដើម្បីពង្រឹងសមត្ថភាពឱ្យត្រៀមខ្លួនរួចជាស្រេចសម្រាប់ការប្រឡងសញ្ញាបត្រមធ្យមសិក្សាទុតិយភូមិខាងមុខ។

• វិធីសាស្ត្របង្រៀនបែបថ្មី (NGS)៖ មិនមែនត្រឹមតែការបង្រៀនធម្មតាទេ តែនឹងមានការផលិតវីដេអូមាតិកាអប់រំតាមស្តង់ដាសាលារៀនជំនាន់ថ្មី (New Generation School) ដែលមានភាពទាក់ទាញ និងងាយយល់។

• ការប្រើប្រាស់ AI ក្នុងការសិក្សា៖ អ្វីដែលកាន់តែពិសេសនោះ គឺការលើកទឹកចិត្តឱ្យគ្រូ និងសិស្សប្រើប្រាស់បច្ចេកវិទ្យា AI ជាឧបករណ៍ជំនួយក្នុងការរៀនសូត្រ និងពង្រឹងសមត្ថភាពភាសាបរទេសទៀតផង។

ក្នុងពិធីនេះដែរ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ ក៏បានសង្កត់ធ្ងន់ថា ការរួមបញ្ចូលគ្នារវាង "ការខិតខំរបស់សិស្ស" និង "បច្ចេកវិទ្យាឌីជីថល" គឺជាកម្លាំងចលករដ៏សំខាន់បំផុតសម្រាប់អនាគតប្រទេសជាតិយើង។ ក្រសួងក៏បានណែនាំឱ្យមន្ទីរអប់រំទាំង ២៥ រាជធានី-ខេត្ត ជួយជំរុញឱ្យប្អូនៗសិស្សានុសិស្សទាញយកប្រយោជន៍ឱ្យអស់ពីកម្មវិធី Live Teaching នេះ ដើម្បីពង្រឹងការធ្វើស្វ័យសិក្សាដោយខ្លួនឯងបន្ថែម។ 

អត្ថបទដោយ៖ ផែន ផាន់ណា
Tech Content Writer Local