លោក James Liang កើតនៅឆ្នាំ ១៩៦៩ នៅទីក្រុងសៀងហៃ ប្រទេសចិន ហើយត្រូវបានគេស្គាល់ថាជាកុមារទេពកោសល្យផ្នែកវិទ្យាសាស្ត្រកុំព្យូទ័រ។ បន្ទាប់ពីបញ្ចប់ការសិក្សាថ្នាក់បរិញ្ញាបត្ររង និងអនុបណ្ឌិតផ្នែកវិទ្យាសាស្ត្រកុំព្យូទ័រនៅសាកលវិទ្យាល័យ Georgia Institute of Technology លោកបានធ្វើការជាអ្នកបច្ចេកទេស និងអ្នកគ្រប់គ្រងនៅក្រុមហ៊ុន Oracle ក្នុងរដ្ឋ California។ នៅឆ្នាំ ១៩៩៩ លោកបានសម្រេចចិត្តត្រឡប់មកប្រទេសចិនវិញ ហើយបានរួមគំនិតជាមួយដៃគូបង្កើតក្រុមហ៊ុន Ctrip ដោយមើលឃើញពីឱកាសរីកចម្រើននៃវិស័យទេសចរណ៍ និងបច្ចេកវិទ្យាអ៊ីនធឺណិត។ ក្រោមការដឹកនាំរបស់លោក ក្រុមហ៊ុន Ctrip បានហក់ឡើងយ៉ាងលឿន និងបានចុះបញ្ជីពាណិជ្ជកម្មនៅផ្សារហ៊ុន NASDAQ (សហរដ្ឋអាមេរិក) នៅឆ្នាំ ២០០៣។

បើនិយាយពីភាពឈឺចាប់ និងវិបត្តិធំបំផុតមួយក្នុងជីវិតជំនួញដំបូងរបស់លោក James Liang គឺការផ្ទុះឡើងនៃជំងឺផ្លូវដង្ហើមសាស (SARS) ក្នុងឆ្នាំ ២០០៣។ នៅក្នុងអំឡុងពេលនោះ ឧស្សាហកម្មទេសចរណ៍ទាំងមូលត្រូវបានកកស្ទះ និងបិទទ្វារស្ទើរតែទាំងស្រុង ដែលធ្វើឲ្យចំណូលរបស់ Ctrip ធ្លាក់ចុះយ៉ាងគំហុក រហូតដល់ក្រុមហ៊ុនស្ទើរតែប្រឈមមុខនឹងការក្ស័យធន។ វាជាការឈឺចាប់ និងជាសម្ពាធផ្លូវចិត្តដ៏ធ្ងន់ធ្ងរសម្រាប់រូបលោកក្នុងនាមជាអ្នកដឹកនាំ ព្រោះលោកត្រូវតស៊ូរក្សាក្រុមហ៊ុន និងបុគ្គលិកដោយគ្មានប្រាក់ចំណូល។ ទោះជាយ៉ាងណា លោកបានប្រែក្លាយវិបត្តិនេះទៅជាឱកាស ដោយមិនបញ្ឈប់បុគ្គលិកឡើយ ប៉ុន្តែបានប្រើប្រាស់ពេលវេលានោះដើម្បីពង្រឹងប្រព័ន្ធបច្ចេកវិទ្យាខាងក្នុង និងបណ្តុះបណ្តាលបុគ្គលិក រហូតធ្វើឲ្យ Ctrip ស្ទុះងើបឡើងវិញយ៉ាងខ្លាំងក្លាបន្ទាប់ពី SARS បានបញ្ចប់។

នៅឆ្នាំ ២០០៦ លោក James Liang បានសម្រេចចិត្តលាលែងពីតំណែងជាអគ្គនាយក (CEO) ដើម្បីទៅបន្តការសិក្សាថ្នាក់បណ្ឌិតផ្នែកសេដ្ឋកិច្ចនៅសាកលវិទ្យាល័យ Stanford University។ ប៉ុន្តែក្នុងអំឡុងពេលដែលលោកអវត្តមាន ក្រុមហ៊ុន Ctrip បានប្រឈមមុខនឹងភាពឈឺចាប់នៃការប្រកួតប្រជែងយ៉ាងខ្លាំងពីសំណាក់គូប្រជែងថ្មីៗ (ដូចជា eLong និង Qunar) ដែលបានដណ្តើមយកទីផ្សារយ៉ាងច្រើន ហើយបច្ចេកវិទ្យារបស់ Ctrip ចាប់ផ្តើមយឺតយ៉ាវជាងគេ។ ដោយមើលឃើញក្រុមហ៊ុនដែលខ្លួនបង្កើតមកត្រូវធ្លាក់ចុះទន់ខ្សោយ លោក Liang បានត្រឡប់មកកាន់តំណែងជា CEO វិញនៅឆ្នាំ ២០១៣។ លោកបានកែប្រែទម្រង់ពាណិជ្ជកម្មរបស់ Ctrip ទាំងស្រុងដោយផ្អែកលើ Mobile Internet (App) ហើយបានដឹកនាំការទិញយក និងរួមបញ្ចូលគ្នានៃគូប្រជែងធំៗ ព្រមទាំងបានទិញយកក្រុមហ៊ុន Skyscanner ក្នុងឆ្នាំ ២០១៦ រហូតប្តូរឈ្មោះក្រុមហ៊ុនទាំងមូលទៅជា Trip.com Group។

ចំពោះភាពឈឺចាប់ដ៏ធំមួយទៀតបានកើតឡើងនៅឆ្នាំ ២០២០ ជាមួយនឹងការរីករាលដាលនៃជំងឺកូវីដ-១៩ ដែលបានវាយប្រហារលើឧស្សាហកម្មទេសចរណ៍ពិភពលោកធ្ងន់ធ្ងរជាងវិបត្តិ SARS ទៅទៀត។ ប្រាក់ចំណូលរបស់ Trip.com បានធ្លាក់ចុះជាច្រើនពាន់លានដុល្លារ តែលោក James Liang បានចេញមុខផ្ទាល់ដោយធ្វើការ Live-stream លក់កញ្ចប់ទេសចរណ៍ និងសណ្ឋាគាររាប់សិបដង ដើម្បីស្រោចស្រង់ក្រុមហ៊ុន។ ក្រៅពីពិភពជំនួញ លោក Liang ក៏ជាអ្នកជំនាញខាងប្រជាសាស្ត្រ (Demographer) ដ៏ល្បីល្បាញមួយរូបក្នុងប្រទេសចិន ដែលលោកតែងតែតស៊ូមតិ និងរិះគន់គោលនយោបាយកូនមួយរបស់ចិនកាលពីមុន ដោយបង្ហាញពីការបារម្ភ និងភាពឈឺចាប់ចំពោះការធ្លាក់ចុះនៃអត្រាកំណើត និងផលប៉ះពាល់សេដ្ឋកិច្ចរយៈពេលវែងរបស់ប្រទេសចិន។

គូសបញ្ជាក់ផងដែរថា បន្ទាប់ពីបានឆ្លងកាន់បញ្ហាឥតឈប់ និងវិបត្តិសេដ្ឋកិច្ចជាច្រើនលើកច្រើនសារ រហូតដល់បច្ចុប្បន្ននេះ ក្រុមហ៊ុន Trip.com Group មានតម្លៃទីផ្សារប្រមាណជាង ៤០ ពាន់លានដុល្លារអាមេរិក នៅលើផ្សារហ៊ុន NASDAQ និង Hong Kong Stock Exchange ដោយបានបង្កើតបណ្តាញដៃគូសហការយ៉ាងទូលំទូលាយទូទាំងសកលលោក រួមមានសណ្ឋាគារ និងកន្លែងស្នាក់នៅជាង ១.២ លាន កន្លែង ព្រមទាំងក្រុមហ៊ុនអាកាសចរណ៍ដៃគូជាង ៦០០ ក្រុមហ៊ុន ដើម្បីផ្តល់ជម្រើសជើងហោះហើរ និងសេវាកម្មធ្វើដំណើរដ៏សម្បូរបែបជូនដល់អតិថិជនរាប់រយលាននាក់ជុំវិញពិភពលោក។