គម្រោង AI របស់ខ្មែរដែលធ្វើឱ្យគណៈមេប្រយោគអន្តរជាតិកោតសរសើរនិងផ្តល់តម្លៃខ្ពស់នេះមានឈ្មោះថា Voha.ai។ វាគឺជាកម្មវិធីបញ្ញាសិប្បនិម្មិតដែលត្រូវបានបង្កើតឡើងក្នុងគោលដៅមនុស្សធម៌ និងដោះស្រាយបញ្ហាសង្គម ដើម្បីជួយដល់កុមារដែលមានពិការភាពផ្នែកការស្ដាប់ (កុមារគថ្លង់) ឱ្យអាចរៀននិយាយបានកាន់តែងាយស្រួល និងឆាប់រហ័សជាងមុន។ កម្មវិធីនេះបានរួមបញ្ចូលគ្នាយ៉ាងទាក់ទាញរវាងមេរៀនសិក្សា និងល្បែងកម្សាន្ត ដោយប្រើប្រាស់បច្ចេកវិទ្យា AI ដើម្បីបង្ហាត់ការបញ្ចេញសំឡេង ដែលជាហេតុធ្វើឱ្យគណៈមេប្រយោគវាយតម្លៃខ្ពស់ទៅលើការកំណត់បញ្ហាបានចំគោលដៅ និងការប្រើប្រាស់បច្ចេកទេសដោះស្រាយដ៏មានប្រសិទ្ធភាព។

នៅពីក្រោយភាពជោគជ័យនៃគម្រោងដ៏ឆ្នើមនេះ គឺជាការខិតខំប្រឹងប្រែងរបស់និស្សិតកម្ពុជាពីររូបមកពីសាកលវិទ្យាល័យអាមេរិកាំងភ្នំពេញ (AUPP) គឺលោក គាន យូហ័ង ជានិស្សិតទើបបញ្ចប់ការសិក្សាឆ្នាំ២០២៦ និងលោក គង់ លីជីង ជានិស្សិតឆ្នាំទី៤។ ដើម្បីទទួលបានតំណែងជើងឯករងនេះ ពួកគេបានឆ្លងកាត់ការប្រកួតយ៉ាងស្វិតស្វាញរយៈពេលជាង ៤ខែ ដែលរៀបចំដោយមូលនិធិអាស៊ាន Google.org និងស្ថាប័ន AI Singapore ចាប់តាំងពីវគ្គបណ្ដុះបណ្ដាល ការតាក់តែងសំណើគម្រោង ការអភិវឌ្ឍកម្មវិធីសាកល្បងក្នុងស្រុក រហូតឈានទៅប្រកួតប្រជែងបន្តនៅកម្រិតតំបន់។

សមិទ្ធផលនេះគឺជាមោទនភាពរបស់ជាតិទាំងមូល។ ក្នុងកម្មវិធីប្រគល់ពានរង្វាន់នៅប្រទេសសិង្ហបុរី យុវជនខ្មែរទាំងពីររូបបានទទួលពានរង្វាន់ដោយផ្ទាល់ពី ឯកឧត្ដម Tharman Shanmugaratnam ប្រធានាធិបតីនៃប្រទេសសិង្ហបុរី។ លើសពីនេះ ពួកគេក៏ទទួលបានការអបអរសាទរដោយផ្ទាល់និងថតរូបអនុស្សាវរីយ៍ជាមួយ ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍កម្ពុជា និងបណ្ដារដ្ឋមន្ត្រីឌីជីថលអាស៊ាន ក្នុងឱកាសដែលឯកឧត្ដមរដ្ឋមន្ត្រីអញ្ជើញចូលរួមកម្មវិធី AsiaTech Singapore 2026 ផងដែរ។ ជ័យជម្នះរបស់គម្រោង Voha.ai គឺជាសក្ខីភាពបញ្ជាក់យ៉ាងច្បាស់ថា យុវជនកម្ពុជាពិតជាមានសមត្ថភាពពេញលេញក្នុងការចាប់យក និងអភិវឌ្ឍបច្ចេកវិទ្យា AI ទំនើបៗ ដែលជាកម្លាំងចលករដ៏សំខាន់ក្នុងការជំរុញបរិវត្តកម្មឌីជីថលនៅកម្ពុជា ក្រោមគោលនយោបាយដ៏មុតស្រួចរបស់រាជរដ្ឋាភិបាល។