យោងតាមសេចក្តីថ្លែងការណ៍ផ្លូវការ ចុះថ្ងៃទី៣០ ខែឧសភា ឆ្នាំ២០២៦ ក្រុមហ៊ុន WOWNOW Mobility បានទទួលស្គាល់ថា ក្រោយការចូលរួមប្រជុំ និងទទួលបានការណែនាំពីអាជ្ញាធរគ្រប់គ្រងវិស័យដឹកជញ្ជូន ក្រុមហ៊ុនបានរកឃើញចំណុចខ្វះខាតក្នុងប្រព័ន្ធអនុលោមភាពរបស់ខ្លួន។ បទប្បញ្ញត្តិជាធរមានមិនអនុញ្ញាតឱ្យវេទិកាហៅឡានតាមអនឡាញ យកយានយន្តជាកម្មសិទ្ធិរបស់ក្រុមហ៊ុនមកប្រតិបត្តិការឡើយ ប៉ុន្តែក្នុងដំណាក់កាលសាកល្បងដំបូង WOWNOW បានប្រើប្រាស់រថយន្តផ្ទាល់ខ្លួនប្រមាណ 16.4% នៃយានយន្តសរុប។

ដើម្បីបង្ហាញពីភាពស្មោះត្រង់ និងការគោរពច្បាប់ ក្រុមហ៊ុនបានសម្រេចផ្អាកសេវាកម្មតាក់ស៊ី EV នេះជាបណ្តោះអាសន្នភ្លាមៗ ដើម្បីបង្កើតក្រុមការងារពិសេសកែប្រែប្រព័ន្ធប្រតិបត្តិការ និងត្រៀមដាក់សំណើសុំបើកដំណើរការឡើងវិញ ក្រោយទទួលបានការអនុម័តពីអាជ្ញាធរ។

មុនឈានដល់ការប្រកាសផ្អាកនេះ យុទ្ធនាការទីផ្សាររបស់ WOWNOW បានបង្កើតឱ្យមានលំហូរមតិពីរផ្ទុយគ្នា៖
•    ភាគីអ្នកតវ៉ា (បងប្អូនអ្នករត់កង់បី)៖ បានបង្ហាញក្តីបារម្ភ និងការមិនពេញចិត្តយ៉ាងខ្លាំង ដោយសារការបញ្ចុះតម្លៃទាបរបស់តាក់ស៊ី WOWNOW អាចបង្កើនការប្រកួតប្រជែងខ្ពស់ និងជះឥទ្ធិពលអវិជ្ជមានដល់ប្រាក់ចំណូលប្រចាំថ្ងៃរបស់ពួកគាត់។
•    ភាគីអ្នកគាំទ្រ (អតិថិជន និងអ្នកដំណើរ)៖ បានសម្តែងការស្វាគមន៍យ៉ាងខ្លាំង ព្រោះសេវាកម្មនេះផ្តល់ជម្រើសធ្វើដំណើរដែលមានផាសុកភាព សុវត្ថិភាព មិនក្តៅ មិនត្រូវភ្លៀង និងមានតម្លៃសមរម្យសម្រាប់ប្រជាពលរដ្ឋទូទៅ។ អ្នកប្រើប្រាស់ជាច្រើនថែមទាំងបានបញ្ចេញមតិស្នើសុំឱ្យក្រុមហ៊ុនបើកដំណើរការសេវាកម្មនេះឡើងវិញក្នុងពេលឆាប់ៗទៀតផង។

ទាក់ទិននឹងតម្លៃទាបនៅលើកម្មវិធី ក្រុមហ៊ុនបានបំភ្លឺថា វាមិនមែនជាការកាត់ទឹកប្រាក់របស់អ្នកបើកបរនោះទេ ពោលគឺអ្នកបើកបរនៅតែទទួលបានប្រាក់ឈ្នួលតាមអត្រាពេញលេញធម្មតា ដោយសារក្រុមហ៊ុនជាអ្នកចេញមុខរ៉ាប់រងការខាតបង់ និងឧបត្ថម្ភធនលើតម្លៃបញ្ចុះទាំងនោះ ដើម្បីពង្រីកទីផ្សារ និងជួយឱ្យដៃគូបើកបររកចំណូលបានបន្ថែម។

ទោះបីជាការផ្អាកនេះធ្វើឡើងដើម្បីបំពេញខ្នាតគតិយុត្តិក៏ដោយ ប៉ុន្តែវាបានជះឥទ្ធិពលភ្លាមៗដល់ប្រាក់ចំណូល និងជីវភាពរស់នៅរបស់ដៃគូអ្នកបើកបរជិត ១,០០០ នាក់ ដែលបានចុះបញ្ជីនៅលើវេទិកា WOWNOW។ អ្នកបើកបរភាគច្រើនសុទ្ធតែជាមេគ្រួសារ ដែលត្រូវរ៉ាប់រងបន្ទុកចំណាយថេរប្រចាំថ្ងៃ ដូចជា ថ្លៃទឹកភ្លើង ថ្លៃផ្ទះជួល សាលារៀនកូនៗ និងជាពិសេសគឺកាតព្វកិច្ចបង់រំលស់រថយន្តទៅកាន់ធនាគារ។ បច្ចុប្បន្ន ក្រុមហ៊ុនកំពុងសម្របសម្រួលជាមួយស្ថាប័នពាក់ព័ន្ធ ដើម្បីកាត់បន្ថយផលប៉ះពាល់នេះឱ្យនៅកម្រិតទាបបំផុត ។

ប្រសិនបើយើងក្រឡេកមើលទៅលើទស្សនវិស័យរយៈពេលវែង ការនាំយកនូវរថយន្តអគ្គិសនី (EV) មកប្រើប្រាស់ក្នុងវិស័យដឹកជញ្ជូនសាធារណៈ គឺជាជំហានវិជ្ជមានមួយសម្រាប់កម្ពុជា។ វិស័យតាក់ស៊ី EV មិនត្រឹមតែជួយកាត់បន្ថយការចំណាយលើឥន្ធនៈសម្រាប់អ្នកបើកបរ និងផ្តល់តម្លៃសមរម្យដល់អ្នកដំណើរទូទៅប៉ុណ្ណោះទេ ប៉ុន្តែវាក៏ជារួមចំណែកយ៉ាងធំធេងដល់ការកាត់បន្ថយការបំភាយឧស្ម័នពុល ការពារបរិស្ថានទីក្រុង និងជួយលើកកម្ពស់មុខមាត់ប្រព័ន្ធដឹកជញ្ជូនរបស់ប្រទេសឱ្យកាន់តែទំនើប ជឿនលឿន ស្របតាមនិន្នាការសកលលោក។

អ្នកជំនាញផ្នែកឧស្សាហកម្មដឹកជញ្ជូនបានលើកឡើងថា ការរក្សាតុល្យភាពរវាងអត្ថប្រយោជន៍របស់អ្នកប្រើប្រាស់ ការធានាប្រាក់ចំណូលប្រកបដោយសមធម៌របស់អ្នកបើកបរគ្រប់ប្រភេទ (ទាំងកង់បី និងតាក់ស៊ី) ព្រមទាំងការគោរពច្បាប់របស់អាជីវកម្មបច្ចេកវិទ្យា គឺជាសោរគន្លឹះដ៏សំខាន់សម្រាប់ជំរុញសេដ្ឋកិច្ចឌីជីថលនៅកម្ពុជាឱ្យមានចីរភាព។
បច្ចុប្បន្ន សាធារណជន និងអ្នកបើកបរជិត ១,០០០ នាក់ កំពុងរង់ចាំមើលការវិលត្រឡប់មកវិញនៃសេវាកម្មរបស់ WOWNOW ក្រោយការកែតម្រូវខ្នាតគតិយុត្តិផ្ទៃក្នុងរួចរាល់៕