លោក ធី មួយហាក់ (Thy Muoyhak) បានបញ្ចប់ការសិក្សាថ្នាក់ទុតិយភូមិ នៅនៅវិទ្យាល័យ ហ៊ុនសែនកំចាយមារ ខេត្ដព្រៃវែង។ បច្ចុប្បន្ន លោកកំពុងបន្តការសិក្សាថ្នាក់បរិញ្ញាបត្រឆ្នាំទី ៤ នៅសាកលវិទ្យាល័យ ប៊ែលធី អន្តរជាតិ (BELTEI International University) លើជំនាញ ព័ត៌មានវិទ្យា និងវិទ្យាសាស្ត្រកុំព្យូទ័រ (IT & Computer Science)។ ក្រៅពីការសិក្សា បច្ចុប្បន្នលោកជាស្ថាបនិក និងជាប្រធានដឹកនាំ នៃវេទិកាអប់រំបច្ចេកវិទ្យា CodeKhmerLearning ផង ជា Web Developer អាជីពដែលកំពុងបម្រើការងារនៅក្នុងក្រុមហ៊ុនមួយកន្លែងផង ព្រមទាំងជាអ្នកទទួលធ្វើគម្រោង និងជាគ្រូបង្រៀន (Technical Instructor) ផ្នែកសរសេរកូដផងដែរ។

លោក បានចាប់ផ្តើមបង្កើតគម្រោង និងអភិវឌ្ឍវេបសាយ CodeKhmerLearning នេះឡើងតាំងពីអំឡុងពេលសិក្សាឆ្នាំទី ២ មកម្ល៉េះ។ គិតមកទល់ពេលនេះ វេទិការបស់លោកទទួលបានការគាំទ្រយ៉ាងច្រើនពីសំណាក់សហគមន៍អ្នកសិក្សា ដោយមានអ្នកតាមដាន៖ 

• Telegram Channel៖ ជាង 5K+ នាក់
• Facebook Page៖ ជាង 10K+ នាក់ 
• TikTok៖ ជាង 10K+ នាក់

វាបានដើរតួយ៉ាងសំខាន់ក្នុងការជួយសិស្ស និងនិស្សិតជាច្រើនឱ្យមានឱកាសរៀនកូដប្រកបដោយប្រសិទ្ធភាព។ សម្រាប់ការយល់ឃើញរបស់លោក បានកត់សម្គាល់ឃើញថា ឯកសារ និងមេរៀន Programming ល្អៗភាគច្រើនគឺសុទ្ធសឹងតែជាភាសាអង់គ្លេស។ នេះជាឧបសគ្គមួយសម្រាប់យុវជនខ្មែរមួយចំនួនដែលចង់រៀនកូដ ប៉ុន្តែមានកម្រិតផ្នែកភាសាអង់គ្លេសក្នុងការអាន Document ទាំងនោះ។ ដូច្នេះហើយគោលបំណងធំបំផុតរបស់លោក គឺការចង់ចែករំលែកឡើងវិញនូវអ្វីដែលលោកបានរៀនពីសាកលវិទ្យាល័យ ឬក៏បទពិសោធន៍ដែលលោកបានស្រាវជ្រាវផ្ទាល់ខ្លួននូវបច្ចេកវិទ្យាថ្មីៗ និងការធ្វើការងារជាក់ស្តែងក្នុងក្រុមហ៊ុន។ លោកចង់បង្កើតប្រភពធនធានជាភាសាខ្មែរ ដែលងាយយល់ ងាយរៀនតាម និងមិនគិតថ្លៃ ដើម្បីជួយសម្រាលបន្ទុក និងជម្រុញល្បឿននៃការរៀនសូត្ររបស់យុវជនខ្មែរដែលស្រលាញ់វិស័យ IT មួយនេះ ។

លោក ធី មួយហាក់ បន្តលើកឡើងថា កន្លងមកនេះលោកបានបង្កើតគម្រោងវេបសាយធំៗចំនួនពីរ រួមមាន៖

១. CodeKhmerLearning៖ គឺជាវេបសាយសិក្សា Programming និង Information Technology (IT) ជាភាសាខ្មែរ ដែលផ្តោតលើការផ្តល់មេរៀន សៀវភៅឌីជីថល វគ្គសិក្សាវីដេអូ និងឯកសារបច្ចេកទេសសម្រាប់អ្នកចាប់ផ្តើម និងអ្នកអភិវឌ្ឍជំនាញ Coding។ វេបសាយនេះត្រូវបានបង្កើតឡើងដើម្បីធ្វើឲ្យការសិក្សា Programming កាន់តែងាយស្រួលសម្រាប់អ្នកនិយាយភាសាខ្មែរ ដោយមានមាតិកាដែលរៀបចំចាប់ពីកម្រិត Beginner រហូតដល់ Advanced។ អ្នកសិក្សាអាចស្វែងយល់អំពី Web Development, Software Development និងបច្ចេកវិទ្យាទំនើបផ្សេងៗតាមរយៈការអនុវត្តជាក់ស្តែង និងឧទាហរណ៍កូដដែលងាយយល់។ CodeKhmerLearning.site ផ្តល់មេរៀន និងវគ្គសិក្សាជាច្រើនដូចជា HTML, CSS, JavaScript, Python, React.js, Node.js, Spring Boot, Database & SQL ព្រមទាំងការបង្កើត Website និង Deploy Project ទៅលើ Internet។ វេបសាយក៏មានការបង្រៀនអំពី Git & GitHub, Responsive Design និងការប្រើ AI ជួយសរសេរកូដផងដែរ។ បន្ថែមពីនេះ CodeKhmerLearning ក៏មានសហគមន៍សិក្សាតាម Telegram ដែលអនុញ្ញាតឲ្យអ្នកសិក្សាទទួលបានព័ត៌មានថ្មីៗ អំពីវគ្គសិក្សា មេរៀន និងការអាប់ដេតបច្ចេកវិទ្យា។ Telegram Channel CodeKhmerLearning

២. CodeKhmerVideo៖ គឺជាវេទិកាថ្មីមួយដែលផ្ដោតលើការរៀនសរសេរកូដតាមរយៈវីដេអូ ដែលត្រូវបានរចនាឡើងយ៉ាងផ្ចិតផ្ចង់បំផុតជាមួយលក្ខណៈពិសេស៖ 

• ការរៀបរាប់ច្បាស់លាស់ពីកម្រិតដំបូង៖ រាល់មេរៀននីមួយៗត្រូវបានពន្យល់ជាភាសាខ្មែរបែបសាមញ្ញ ងាយយល់ ទោះបីជាសិស្សមិនធ្លាប់មានមូលដ្ឋានគ្រឹះ សោះក៏អាចរៀនតាមទាន់។ 
•  ផ្ដោតលើការអនុវត្តគម្រោងជាក់ស្តែង៖ មិនត្រឹមតែបង្រៀនទ្រឹស្តីនោះទេ ប៉ុន្តែសិស្សនឹងបានអនុវត្តបង្កើតគម្រោងពិតៗ ដូចជាការធ្វើ Website Layouts, API Connections និងការបង្កើត App ផ្ទាល់ខ្លួន ដែលអាចយកទៅដាក់ក្នុង Portfolio សម្រាប់ដាក់ពាក្យធ្វើការបាន។ 
• រចនាសម្ព័ន្ធមេរៀនច្បាស់លាស់៖ វីដេអូត្រូវបានរៀបចំជាកញ្ចប់វគ្គសិក្សា ពីកម្រិតដំបូង រហូតដល់កម្រិតខ្ពស់ ជួយឱ្យអ្នកសិក្សាមិនវង្វេង និងដឹងពីគោលដៅច្បាស់លាស់ក្នុងការរៀន។ 
• រចនាឡើងដើម្បី រៀនបានគ្រប់ពេលវេលា៖ បង្កើតឡើងដើម្បីបើកឱកាសឱ្យយុវជន និងសិស្សានុសិស្សខ្មែរគ្រប់រូប អាចចូលក្រេបជញ្ជក់ចំណេះដឹងផ្នែកឌីជីថល និង Programming បានដោយសេរី មិនថានៅទីកន្លែងណាក៏ដោយ។

លោក ធី មួយហាក់ ក៏បានប្រាប់អំពី ផ្នែកធនធាន និងសម្ភារៈ ដែលចាំបាច់បំផុតនោះគឺ កុំព្យូទ័រ (Laptop/PC) ដែលមានកម្លាំងល្មមអាចដំណើរការកម្មវិធីសរសេរកូដបាន, ប្រព័ន្ធអ៊ីនធឺណិតសម្រាប់ស្រាវជ្រាវ និងសំខាន់បំផុតគឺ ចំណេះដឹង បទពិសោធន៍ និងពេលវេលាក្នុងការអភិវឌ្ឍប្រព័ន្ធ។ ចំពោះផ្នែកថវិកាវិញ ដោយសារការធ្វើឡើងក្នុងគោលបំណងចែករំលែកចំណេះដឹងឥតគិតថ្លៃ ការចំណាយត្រូវបានកាត់បន្ថយមកត្រឹមកម្រិតទាបបំផុត គឺក្រោម $20-$50 ប៉ុណ្ណោះក្នុងមួយឆ្នាំ សម្រាប់ Domain និង Server/Hosting ទំហំដំបូង ដោយប្រើប្រាស់ Free Tiers ឬ Cloud តម្លៃសមរម្យ។ មានន័យថាដើមទុនជាសាច់ប្រាក់គឺតិចតួចបំផុត ប៉ុន្តែដើមទុនជាកម្លាំងខួរក្បាល ការតាំងចិត្ត និងពេលវេលាស្រាវជ្រាវ គឺត្រូវទាមទារខ្ពស់បំផុត។ 

សម្រាប់ទៅថ្ងៃអនាគត លោកនឹងបន្តពង្រឹងវេទិកាទាំងពីរ (CodeKhmerLearning & CodeKhmerVideo) ឱ្យកាន់តែសម្បូរបែប ដោយបន្ថែមវគ្គសិក្សាថ្មីៗ និងការធ្វើស្វ័យប្រវត្តកម្មផ្សេងៗ។ ជាពិសេស លោកមានគម្រោងនាំយកបច្ចេកវិទ្យា AI មកបញ្ចូលក្នុងប្រព័ន្ធសិក្សា ដើម្បីជួយឱ្យសិស្សានុសិស្សអាចសាកសួរ និងដោះស្រាយបញ្ហាកូដបានកាន់តែរហ័សទាន់ចិត្តផងដែរ។ 

ជាចុងក្រោយ ផ្អែកលើបទពិសោធន៍ដែលលោក ធី មួយហាក់ កំពុងរៀននៅសាកលវិទ្យាល័យ ធ្វើការក្នុងក្រុមហ៊ុន និងបង្រៀនសិស្សសព្វថ្ងៃ លោកបានផ្ដាំផ្ញើទៅកាន់យុវជនជំនាន់ក្រោយថា៖

« វិស័យបច្ចេកវិទ្យា និង AI ដើរលឿនណាស់ អ្វីដែលសំខាន់បំផុតគឺ ការរៀនសូត្រដោយខ្លួនឯង និងភាពទៀងទាត់។ កុំរង់ចាំទាល់តែយើងខ្លាំង ទើបយើងចាប់ផ្ដើមធ្វើ តែត្រូវចាប់ផ្ដើមធ្វើ ទើបយើងក្លាយជាអ្នកដែលខ្លាំង។ នៅពេលដែលអ្នកជួបបញ្ហាក្នុងការសរសេរកូដ ឬចង់ដើរថយក្រោយសូមចងចាំពី មូលហេតុដំបូង ដែលអ្នកបានចាប់ផ្ដើមមក។ ចូរប្រើប្រាស់បច្ចេកវិទ្យា ដើម្បីដោះស្រាយបញ្ហាឱ្យសង្គម នោះគម្រោងរបស់អ្នកនឹងមានតម្លៃពិតប្រាកដ។ »

អត្ថបទដោយ៖ ងួន ឃុនណា