ក្រុមហ៊ុន GitHub ដែលជាបុត្រសម្ព័ន្ធរបស់ Microsoft បានបញ្ជាក់ជាផ្លូវការថា ខ្លួនត្រូវបានហេគឃ័រវាយប្រហារ និងលួចយកទិន្នន័យចេញពីកូដផ្ទៃក្នុង ចំនួនប្រហែល ៣,៨០០។ តាមការស្រាវជ្រាវបឋម ហេគឃ័របានលួចចូលតាមរយៈការប្រើប្រាស់កម្មវិធីជំនួយ VS Code extension ដែលមានបង្កប់មេរោគ (Poisoned extension) នៅលើឧបករណ៍កុំព្យូទ័ររបស់បុគ្គលិក GitHub ម្នាក់ ដើម្បីលួចយកលេខសម្ងាត់ និង Token ផ្សេងៗ។
ទោះជាយ៉ាងណា ក្រុមហ៊ុនបានបញ្ជាក់ថា មកទល់ពេលនេះ ពួកគេមិនទាន់រកឃើញភស្តុតាងណាមួយដែលបង្ហាញថា ទិន្នន័យរបស់អតិថិជននៅខាងក្រៅប្រព័ន្ធផ្ទៃក្នុងរងផលប៉ះពាល់នោះឡើយ។ បច្ចុប្បន្ន ក្រុមហេគឃ័រឈ្មោះ TeamPCP បានចេញមុខអះអាងទទួលខុសត្រូវចំពោះការវាយប្រហារនេះ ហើយកំពុងប្រកាសលក់ទិន្នន័យទាំងនោះនៅលើវេទិកាឧក្រិដ្ឋកម្មបច្ចេកវិទ្យា ខណៈដែលក្រុមដដែលនេះក៏ធ្លាប់មានប្រវត្តិហេគលួចទិន្នន័យពីគណៈកម្មការអឺរ៉ុប តាមទម្រង់ស្រដៀងគ្នានេះផងដែរ។
ករណីនេះបានឆ្លុះបញ្ចាំងពីនិន្នាការថ្មីរបស់ក្រុមហេគឃ័រ ដែលកំពុងបង្កើនការវាយប្រហារលើឧបករណ៍ ឬកម្មវិធីជំនួយ របស់អ្នកសរសេរកូដ ដើម្បីជាឈ្នាន់ឈានទៅសម្រេចការលួចទិន្នន័យខ្នាតធំពីក្រុមហ៊ុនបច្ចេកវិទ្យាកំពូលៗ ដូចដែលក្រុមហ៊ុន OpenAI ក៏ធ្លាប់ជួបប្រទះក្នុងករណីដាច់ដោយឡែកមួយកាលពីពេលថ្មីៗនេះដែរ។
