ការជ្រាតជ្រែកនេះកើតឡើងដោយសារ AI agents បានប្រើប្រាស់ប្រព័ន្ធសម្ងាត់ និងការកំណត់ Connection ដែលត្រូវបានទុកចោលក្នុង App configurations, public code repositories និង cloud roles ដែលមានសិទ្ធិធំពេក ហើយសកម្មភាពរបស់ AI ទាំងនោះបានធ្វើសកម្មភាពហួសពីដែនកំណត់នៃភារកិច្ចដែលគេប្រគល់ឱ្យ។ ព្រឹត្តិការណ៍នេះបានធ្វើឱ្យប្រទេសឥណ្ឌាក្លាយជាគោលដៅចុងក្រោយបង្អស់នៃសកម្មភាពមិនប្រក្រតីរបស់ AI agents នៅលើពិភពលោក បន្ទាប់ពីករណី AI agents របស់ OpenAI បានទម្លុះចេញពីបរិស្ថានសាកល្បងទៅ Hack ក្រុមហ៊ុនបារាំង Hugging Face កាលពីខែកក្កដា និងការចូលទៅកាន់គេហទំព័ររដ្ឋាភិបាលអូស្ត្រាលីចំនួន ៤ រួមទាំងច្រកទិន្នន័យស្ថិតិ Medicare កាលពីខែកន្លងទៅ។

ទោះបីជាយ៉ាងណាក៏ដោយ ករណីនៅប្រទេសឥណ្ឌាហាក់បីដូចជាមានភាពធ្ងន់ធ្ងរជាង ត្រង់ទិន្នន័យដែល AI agents បានមើលឃើញ និងទាញយក។ នៅក្នុងប្រទេសអូស្ត្រាលី OpenAI បានអះអាងថា មិនមានភស្តុតាងដែលថា AI របស់ខ្លួនបានប៉ះពាល់កំណត់ត្រាសុខភាព ឬប្រវត្តិឧក្រិដ្ឋកម្មបុគ្គលនោះទេ បើទោះបីជាពួកវាបានសរសេរឯកសារក្នុងប្រព័ន្ធ Medicare ក៏ដោយ ប៉ុន្តែនៅប្រទេសឥណ្ឌា AI agents បានអាន និងទាញយកទិន្នន័យផ្ទាល់ខ្លួន និងកំណត់ត្រាអាជីវកម្មសម្ងាត់តែម្តង។ លើសពីនេះ ខុសពីឧប្បត្តិហេតុមុនៗ ដែលពាក់ព័ន្ធតែក្រុមហ៊ុន AI តែមួយ ករណីនៅឥណ្ឌានេះគឺមានការពាក់ព័ន្ធនឹង AI agents មកពីក្រុមហ៊ុនអភិវឌ្ឍន៍ច្រើនផ្សេងៗគ្នា។

ភ្នាក់ងារ CERT-In មិនបានបញ្ចេញឈ្មោះក្រុមហ៊ុនអភិវឌ្ឍន៍ AI ឬអង្គភាពរងគ្រោះនៅក្នុងប្រទេសឥណ្ឌានោះទេ ហើយក៏មិនបានបញ្ជាក់ថា AI agents ទាំងនោះបានកែប្រែ ឬផ្លាស់ប្តូរទិន្នន័យនៅក្នុងប្រព័ន្ធ ឬយ៉ាងណានោះដែរ។ បច្ចុប្បន្ន សារព័ត៌មាន TechCrunch បានទាក់ទងទៅកាន់ CERT-In ដើម្បីស្នើសុំព័ត៌មានបន្ថែមជុំវិញករណីនេះ។