ដើម្បីឆ្លើយតបទៅនឹងតម្រូវការទីផ្សារ និងការយកចិត្តទុកដាក់លើសុខភាពអ្នកបរិភោគ ការប្រើប្រាស់រូបសញ្ញាស្តង់ដាការអនុវត្តកសិកម្មល្អកម្ពុជា (CamGAP) ភ្ជាប់ជាមួយនឹងប្រព័ន្ធ QR Code នៅលើកសិផលកម្ពុជា កំពុងដើរតួនាទីយ៉ាងសំខាន់ក្នុងការលើកកម្ពស់សុវត្ថិភាពចំណីអាហារ និងផ្តល់ទំនុកចិត្តខ្ពស់ដល់អ្នកប្រើប្រាស់។
យោងតាមស្តង់ដាការអនុវត្តកសិកម្មល្អកម្ពុជា (CamGAP) នេះគឺជាយន្តការបច្ចេកទេសដ៏សមស្រប និងល្អប្រសើរមួយក្នុងការជំរុញគុណភាព សុវត្ថិភាព និងចីរភាពបរិស្ថាន ព្រមទាំងធានាសុវត្ថិភាពទាំងសម្រាប់អ្នកដាំដុះ និងអ្នកបរិភោគផ្ទាល់។ ការទទួលបានសិទ្ធិប្រើប្រាស់រូបសញ្ញានេះ មិនមែនជារឿងងាយស្រួលឡើយ ពោលគឺម្ចាស់ចម្ការ ឬកសិដ្ឋានទាំងអស់ត្រូវឆ្លងកាត់ការត្រួតពិនិត្យ និងវាយតម្លៃយ៉ាងហ្មត់ចត់បំផុតពីមន្ត្រីជំនាញ ដើម្បីបញ្ជាក់ថាការដាំដុះពិតជាមានអនុលោមភាពស្របតាមស្តង់ដា CamGAP ប្រាកដមែន។
អ្វីដែលកាន់តែពិសេស និងឆ្លើយតបទៅនឹងយុគសម័យឌីជីថល គឺការបំពាក់ប្រព័ន្ធ QR Code ភ្ជាប់ជាមួយនឹងរូបសញ្ញា CamGAP។ ប្រព័ន្ធនេះអនុញ្ញាតឱ្យអ្នកប្រើប្រាស់អាចធ្វើការតាមដានប្រភពដើមនៃកសិផលបានយ៉ាងងាយស្រួល និងមានតម្លាភាព។ ត្រឹមតែការស្កេនលើ QR Code តាមរយៈទូរសព្ទដៃ អ្នកបរិភោគនឹងទទួលបានព័ត៌មានលម្អិតភ្លាមៗទាក់ទងនឹង អត្តសញ្ញាណអ្នកផលិត ទីតាំងផលិត កន្លែងវេចខ្ចប់ និងទីផ្សារលក់ផលិតផលជាដើម។
តាមរយៈបច្ចេកវិទ្យានេះ វាត្រូវបានគេចាត់ទុកថាជាឧបករណ៍ដ៏មុតស្រួចមួយក្នុងការទប់ស្កាត់ និងការពារការក្លែងបន្លំផលិតផលដែលមានវិញ្ញាបនបត្របញ្ជាក់ស្តង់ដា CamGAP នៅលើទីផ្សារ ព្រមទាំងជួយបង្កើនទំនុកចិត្តយ៉ាងរឹងមាំរវាងអ្នកផលិត និងអ្នកប្រើប្រាស់។
សូមបញ្ជាក់ផងដែរថា រូបសញ្ញា CamGAP ជាមួយនឹង QR Code (CamGAP QR Code stickers) នេះ មិនត្រូវបានចែកចាយដោយទូទៅនោះទេ។ ស្លាកសញ្ញាបញ្ជាក់គុណភាពទាំងនេះ ត្រូវបានផ្តល់ជូនផ្តាច់មុខតែចំពោះម្ចាស់កសិដ្ឋាន កន្លែងវេចខ្ចប់ ឬផ្សារទំនើបណាដែលបានដាក់ពាក្យស្នើសុំជាផ្លូវការទៅកាន់ នាយកដ្ឋានការពារដំណាំ អនាម័យ និងភូតគាមអនាម័យ នៃអគ្គនាយកដ្ឋានក្សេត្រសាស្ត្រ តែប៉ុណ្ណោះ។ តាមរយៈការរឹតបន្តឹងនេះ កម្ពុជារំពឹងថានឹងអាចពង្រឹងគុណភាពកសិផលរបស់ខ្លួនឱ្យកាន់តែមានស្តង់ដាខ្ពស់ និងមានសុវត្ថិភាពសម្រាប់ប្រជាពលរដ្ឋ៕
