ក្រុមហ៊ុន Huawei បានប្រកាសចេញស្មាតហ្វូនស៊េរីថ្មី HUAWEI Mate 90 Series ជាផ្លូវការនៅថ្ងៃទី 01 ខែតុលា ឆ្នាំ 2026 នៅប្រទេសចិន ក្នុងនោះមានម៉ូឌែល Mate 90 Pro Max ដែលភ្ជាប់មកជាមួយមុខងារគួរឱ្យចាប់អារម្មណ៍មួយ គឺអាចគាំទ្រ 4 លេខទូរស័ព្ទ តាមរយៈស៊ីមកាតធម្មតា 2 និង eSIM 2 ហើយអាចឱ្យ 3 លេខស្ថិតក្នុងស្ថានភាពប្រើបានក្នុងពេលតែមួយ។
មុខងារនេះធ្វើឱ្យអ្នកប្រើប្រាស់អាចរក្សាលេខការងារ លេខផ្ទាល់ខ្លួន និងលេខសម្រាប់ប្រើអ៊ីនធឺណិតនៅលើទូរស័ព្ទតែមួយ ដោយមិនចាំបាច់ប្តូរស៊ីមជាញឹកញាប់។ ទោះជាយ៉ាងណា Huawei បញ្ជាក់ថា មុខងារ 3-card standby នេះមានលក្ខខណ្ឌសម្រាប់ទីផ្សារចិន ដោយក្នុងស៊ីម ៣ ដែលកំពុង Standby ត្រូវមានយ៉ាងហោចណាស់ 2 ស៊ីមជាប្រតិបត្តិករចិនដីគោកដូចគ្នា ហើយមុខងារខ្លះត្រូវការអាប់ដេតប្រព័ន្ធ HOTA។
លើសពីសមត្ថភាពគាំទ្រស៊ីមច្រើនក្នុងពេលតែមួយ HUAWEI Mate 90 Pro Max ក៏បានពង្រឹងយ៉ាងខ្លាំងលើផ្នែកកម្លាំងម៉ាស៊ីន និងបច្ចេកវិទ្យាកាមេរ៉ាផងដែរ។ ស្មាតហ្វូននេះបំពាក់ដោយបន្ទះឈីប Kirin ជំនាន់ថ្មីដែលផលិតឡើងដោយបច្ចេកវិទ្យាកម្រិតខ្ពស់ រួមជាមួយប្រព័ន្ធប្រតិបត្តិការ HarmonyOS ជំនាន់ចុងក្រោយ ដែលជួយឱ្យការទាញយកទិន្នន័យ ដំណើរការកម្មវិធី និងការផ្លាស់ប្តូររវាងលេខទូរស័ព្ទទាំងប៉ុន្មានកាន់តែមានភាពរលូន និងសន្សំសំចៃថាមពលថ្មបានយ៉ាងល្អប្រសើរ។ លើសពីនេះ ថាមពលថ្មក៏ត្រូវបានបង្កើនទំហំធំជាងមុន ព្រមទាំងគាំទ្របច្ចេកវិទ្យាសាកថ្មលឿន ultrafast charging ដើម្បីឆ្លើយតបទៅនឹងតម្រូវការរបស់អ្នកប្រើប្រាស់ទូរស័ព្ទច្រើនខ្សែជាប់ជាប្រចាំ។
ចំណែកឯផ្នែកថតរូបវិញ Huawei នៅតែបន្តដឹកនាំទីផ្សារជាមួយនឹងប្រព័ន្ធកាមេរ៉ា XMAGE ជំនាន់អាប់ដេតថ្មី ដែលផ្តល់នូវរូបភាពច្បាស់ម៉ត់ និងពណ៌ធម្មជាតិទោះបីជាស្ថិតក្នុងស្ថានភាពពន្លឺខ្សោយក៏ដោយ។ ការរួមបញ្ចូលគ្នារវាងសមត្ថភាពភ្ជាប់ទំនាក់ទំនងពហុបណ្តាញ (Multi-SIM) និងបច្ចេកវិទ្យាស្មាតហ្វូនលំដាប់កំពូលនេះ ធ្វើឱ្យ HUAWEI Mate 90 Pro Max ក្លាយជាជម្រើសដ៏លេចធ្លោបំផុតមួយសម្រាប់អ្នកជំនួញ និងអ្នកប្រើប្រាស់ដែលត្រូវការភាពបត់បែនខ្ពស់ក្នុងការប្រាសស្រ័យទាក់ទងប្រចាំថ្ងៃ។
