Hacker នឹងផ្ញើ File ដែលមើលទៅដូចជាឯកសារការងារ PDF, Word ឬរូបភាព។ នៅពេលអ្នកចុចបើក ឬទាញយក មេរោគដែលបង្កប់ក្នុងនោះនឹងរត់ចូលទៅលួចយក Session Token នៃ Telegram របស់អ្នកភ្លាមៗ ដែលអនុញ្ញាតឱ្យគេចូលប្រើអាខោនរបស់អ្នកបានដោយមិនចាំបាច់មានលេខកូដ Password ឬ 2FA ឡើយ។ Hacker មិនផ្ញើ File មកក្នុងរូបរាងជាមេរោគចំៗទេ។ គេប្រើរូបភាពបន្លំដូចជា៖

• បន្លំជា PDF៖ តែការពិតវាជា File កម្មវិធី (.exe ឬ .apk)។
• ប្រើគណនីមិត្តភក្តិ៖ គេប្រើអាខោនដែលគេលួចបានមុនៗមកផ្ញើឱ្យយើង ធ្វើឱ្យយើងបាត់ការប្រុងប្រយ័ត្នព្រោះស្មានថាជាអ្នកស្គាល់គ្នាជាដើម។
• ការធ្វេសប្រហែសនឹងកន្ទុយ File៖ មនុស្សភាគច្រើនមើលតែរូបតំណាង (Icon) ឱ្យតែឃើញរូប PDF ឬរូបភាព គឺចុចបើកតែម្តង ដោយមិនបានមើលកន្ទុយឈ្មោះឯកសារខាងចុង (ដូចជា .apk ឬ .exe) ដែលជាប្រភេទ File អាចដំឡើងមេរោគបាន។
• Hacker ច្រើនដាក់ឈ្មោះ File បន្លំដូចជា បញ្ជីប្រាក់ខែ វិក្កយបត្របង់លុយ ឬរូបថតឈ្នះរង្វាន់ ជាដើម។

វិធីការពារខ្លួនឱ្យមានសុវត្ថិភាព៖

• ហាមបើកឯកសារណាដែលផ្ញើមកពីមនុស្សមិនស្គាល់ ឬ File ដែលមានកន្ទុយចម្លែកៗដូចជា .exe, .apk, .bat, ឬ .zip។
• បិទ Auto-Download៖ ចូលទៅកាន់ Settings > Data and Storage > រួចបិទការទាញយកដោយស្វ័យប្រវត្តិ (Automatic Media Download) ទាំងអស់ ដើម្បីកុំឱ្យមេរោគរត់ចូលទូរស័ព្ទដោយយើងមិនដឹងខ្លួន។
• ត្រួតពិនិត្យឧបករណ៍ (Devices)៖ ឧស្សាហ៍ចូលទៅមើលក្នុង Settings > Devices ប្រសិនបើឃើញមានឧបករណ៍ចម្លែកកំពុង Login អាខោនរបស់អ្នក ត្រូវចុច Terminate ឬ Log out ចេញភ្លាម។

គូសបញ្ជាក់ផងដែរថា បើអ្នកឃើញ File ឈ្មោះបែបនេះ ឯកសារការងារ.pdf.exe ឬ រូបថត.jpg.apk នោះគឺជា មេរោគ ១០០% ព្រោះវាលាក់កន្ទុយពិតនៅខាងចុង។ ជាទូទៅ រូបថត ឬឯកសារអត្ថបទខ្លីៗ មានទំហំត្រឹមតែ KB ឬប៉ុន្មាន MB ប៉ុណ្ណោះ។ ប្រសិនបើគ្រាន់តែជារូបថតមួយសន្លឹក ប៉ុន្តែមានទំហំធំខុសធម្មតា (ឧទាហរណ៍ ៥MB ឡើងទៅក្នុងទម្រង់ .apk) នោះគឺជាសញ្ញាគួរឱ្យសង្ស័យហើយ សូមបង្កើនការប្រុងប្រយ័ត្នជាបន្ទាន់។