ទី១-ធ្វើវីដេអូមានប្រយោជន៍៖ ប្រធានបទដែលលើកយកមកនិយាយគួរតែជារឿងដែលមានផលវិជ្ជមាន មានគុណតម្លៃ អាចជួយជាគំនិត ផ្ដល់ជាប្រយោជន៍ទៅកាន់អ្នកស្ដាប់ ឬអ្នកទស្សនា។ ចៀសវាងការនិយាយរឿងអវិជ្ជមាន ដៀមដាមផ្លែផ្កា ឬប្រធានបទណាដែលបង្ករជម្លោះ ជំនួសដោយរឿងមានប្រយោជន៍ដូចជា គន្លឹះចាត់ចែងលុយ ទម្លាប់ល្អៗ គំនិតយោបល់សម្រាប់ជួយយុវជនក្នុងការសម្រេចចិត្តជាដើម។

ទី២-ស្វែងយល់ពីទស្សនិកជន៖ នៅក្នុងកម្មវិធីបណ្ដាញសង្គម មានកន្លែងសម្រាប់ចូលទៅពិនិត្យមើលអំពី ទស្សនិកជន (audience) ដែលអាចបង្ហាញអំពីក្រុមអាយុ ភេទ របស់អ្នកទស្សនាវីដេអូរបស់អ្នក ភាគច្រើនជាអ្នកណា។ បើសិនជាឃើញថាជាមនុស្សស្រីភាគច្រើន អាចជ្រើសរើសប្រធានបទណាដែលទាក់ទងជាមួយពួកគាត់ ដូចជារបៀបធ្វើម្ហូបថ្មីៗ របៀបមើលថែកូន របៀបបង្កើនចំណូល ឬចាត់ចែងលុយកាក់ជាដើម។

ទី៣-រៀនបន្តជានិច្ច៖ យកអ្នកដែលជោគជ័យ ឬអ្នកបានដើរមុន ជាគម្រូ រៀនពីគេ ដោយត្រង់យកចំណុចរីកចម្រើន គន្លឹះដោះស្រាយបញ្ហា ការអភិវឌ្ឍន៍ខ្លួន ជាពិសេសគឺស្តាយ៍ធ្វើវីដេអូ។

លោកស្រី វួចលាង ក៏បានគូសបញ្ជាក់ផងដែរថា «សព្វថ្ងៃការរកស៊ីប្រកបអាជីវកម្ម ត្រូវការពឹងពាក់ជាចាំបាច់ទៅលើការធ្វើទីផ្សារ ជាពិសេសគឺទីផ្សារឌីជីថល (គេនិយមហៅ ទីផ្សារអនឡាញ) ហេតុនេះត្រូវចេះធ្វើ Personal Branding ឱ្យខ្លួនឯងមានទីផ្សារសិន បន្ទាប់មកអ្នកលក់អ្វីក៏ដាច់ដែរ។ ហើយកុំភ្លេចរក្សាគុណតម្លៃ និងភាពស្មោះត្រង់ ផ្ដល់នូវអ្វីដែលមានគុណភាពទៅកាន់អតិថិជន ទើបកេរ្តិ៍ឈ្មោះគង់វង្សបានយូរ»៕