យុទ្ធនាការនេះមានគោលដៅចម្បងក្នុងការធានាសុវត្ថិភាពឌីជីថលជូនប្រជាពលរដ្ឋ និងទប់ស្កាត់បទល្មើសបច្ចេកវិទ្យា តាមរយៈការលុបបំបាត់ការប្រើប្រាស់ស៊ីមកាតដែលគ្មានអត្តសញ្ញាណច្បាស់លាស់ (ស៊ីមខ្មោច) ដែលកំពុងភ្ជាប់ជាមួយគណនីធនាគារនានា។

ដើម្បីសម្រួលដល់ដំណើរការនេះ ប្រជាពលរដ្ឋអាចធ្វើការផ្ទៀងផ្ទាត់បានយ៉ាងងាយស្រួលតាមរយៈកម្មវិធី SIM Verifier Mini App ដែលរួមបញ្ចូលនៅក្នុងថ្នាលសេវាឌីជីថលរដ្ឋ DG SuperApp។ ថ្នាលនេះត្រូវបានតភ្ជាប់ប្រព័ន្ធដោយស្វ័យប្រវត្តិជាមួយគ្រឹះស្ថានធនាគារ និងហិរញ្ញវត្ថុ ដែលជួយជំរុញទំនុកចិត្តទាំងក្នុងវិស័យធនាគារ និងទូរគមនាគមន៍នៅកម្ពុជា។

ថ្លែងក្នុងពិធីនោះ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានមានប្រសាសន៍ថា ការផ្ទៀងផ្ទាត់ភាពត្រឹមត្រូវនៃលេខទូរសព្ទ និងអត្តសញ្ញាណនេះ គឺជារឿងចាំបាច់បំផុតក្នុងការការពារសុវត្ថិភាពទិន្នន័យហិរញ្ញវត្ថុ ជាពិសេសលេខកូដសុវត្ថិភាព (OTP) ពីការលួចចូល ឬឆបោកពីសំណាក់ឧក្រិដ្ឋជនបច្ចេកវិទ្យា។ លោកជំទាវក៏បានអំពាវនាវឱ្យសាធារណជនចូលរួមយ៉ាងសកម្មក្នុងយុទ្ធនាការនេះ ដើម្បីផលប្រយោជន៍ និងសុវត្ថិភាពផ្ទាល់ខ្លួន។

ទន្ទឹមនឹងនេះ ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានណែនាំដល់ក្រុមការងារបច្ចេកទេស និងប្រតិបត្តិករទូរសព្ទចល័ត ឱ្យចុះជួយសម្រួលការផ្ទៀងផ្ទាត់នេះដោយផ្ទាល់នៅតាមក្រសួង ស្ថាប័ន គ្រឹះស្ថានសិក្សា រោងចក្រ និងទីប្រជុំជននានា។ ឯកឧត្តមបណ្ឌិត ក៏បានជំរុញឱ្យអ្នកផលិតមាតិកា (Content Creators) និងបុគ្គលមានប្រជាប្រិយភាព ជួយផលិតវីដេអូអប់រំខ្លីៗ ងាយយល់ ដើម្បីផ្សព្វផ្សាយពីសារៈសំខាន់នៃការផ្ទៀងផ្ទាត់នេះទៅកាន់ប្រជាពលរដ្ឋឱ្យបានទូលំទូលាយ។

គួររំឭកផងដែរថា ការចាប់ផ្តើមយុទ្ធនាការនេះ គឺជាលទ្ធផលផ្លែផ្កាចេញពីអនុស្សរណៈនៃការយោគយល់គ្នា (MoU) រវាងស្ថាប័នទាំងពីរ កាលពីថ្ងៃទី១០ ខែធ្នូ ឆ្នាំ២០២៥។ គំនិតផ្តួចផ្តើមនេះ ធ្វើឡើងស្របតាមគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ ក្នុងការកសាងសេដ្ឋកិច្ច និងសង្គមឌីជីថលប្រកបដោយបរិយាបន្ន និងសុវត្ថិភាព។