តាមការប្រកាសរបស់ក្រុមហ៊ុន Meta កាលពីថ្ងៃទី១៣ ខែតុលា ឆ្នាំ២០២៦ បានឱ្យដឹងថា «Your Algorithm» ជាឧបករណ៍ដែលធ្វើឱ្យអ្នកប្រើប្រាស់អាចបន្ថែម និងគ្រប់គ្រងមាតិកាដែលខ្លួនចង់ឃើញនៅលើ Feed និង Reels។ ក្នុងនោះ អ្នកប្រើប្រាស់អាចប្រាប់ Facebook ដោយផ្ទាល់ តាមរយៈពាក្យសម្ដីថា អ្នកចាប់អារម្មណ៍ទៅលើអ្វី និងចង់ឃើញមាតិកាប្រភេទណាឱ្យបានច្រើន ឬតិចជាងមុន។

មុខងារនេះ ត្រូវបានបង្កើតឡើង ដើម្បីឱ្យអ្នកប្រើប្រាស់អាចគ្រប់គ្រងមាតិកាដែលខ្លួនចង់ឃើញបានកាន់តែច្រើន ដោយមិនចាំបាច់ពឹងផ្អែកទាំងស្រុងលើប្រព័ន្ធណែនាំមាតិកាដោយស្វ័យប្រវត្តិរបស់ Facebook នោះទេ។ អ្នកអាចគ្រប់គ្រងមាតិកា បានភ្លាមៗ បន្ទាប់ពីអ្នកផ្តល់ព័ត៌មានអំពីចំណូលចិត្ត។

ចំពោះ របៀបគ្រប់គ្រងមាតិកានៅលើ Facebook

១. ចូលទៅកាន់ Facebook ហើយស្វែងរកការបង្ហោះដែលអ្នកចំណូលចិត្ត

២. រួចចុចលើរូបសញ្ញា (⋯) នៅលើការបង្ហោះ

៣. ជ្រើសរើស «Interested» ប្រសិនបើអ្នកចាប់អារម្មណ៍លើមាតិកា ឬ «Not interested» ប្រសិនបើអ្នកមិនចង់ឃើញមាតិកាបែបនេះទៀត

៤. អ្នកអាចចូលទៅកាន់ «Your Algorithm» ដើម្បីបន្ថែម ឬគ្រប់គ្រងមាតិកា ដែលអ្នកចង់ឃើញនៅលើ Feed និង Reels

គួរបញ្ជាក់ថា មុខងារនេះមិនមែនមានន័យថា អ្នកប្រើប្រាស់អាចគ្រប់គ្រងមាតិកាទាំងអស់ដែលបង្ហាញលើ Facebook បានទាំងស្រុងនោះទេ។ មុខងារ Your Algorithm គ្រាន់តែឱ្យអ្នកប្រើប្រាស់បានបញ្ជាក់ពីចំណងចំណូលចិត្តដោយផ្ទាល់បន្ថែមលើសញ្ញាដែលប្រព័ន្ធប្រមូលបាន។

សម្រាប់អ្នកប្រើប្រាស់ដែលចង់ឱ្យ Feed និង Reels បង្ហាញមាតិកាស្របតាមចំណាប់អារម្មណ៍របស់ខ្លួន មុខងារថ្មីនេះអាចជួយឱ្យការប្រើប្រាស់ Facebook កាន់តែមានភាពងាយស្រួល និងផ្តល់ជម្រើសគ្រប់គ្រងមាតិកាបានច្រើនជាងមុន។ មុខងារនេះកំពុងដាក់ឱ្យប្រើប្រាស់ជាបន្តបន្ទាប់ ដូច្នេះអ្នកប្រើប្រាស់មួយចំនួនអាចមិនទាន់ឃើញជម្រើសនេះនៅលើគណនីរបស់ខ្លួនទេ៕