ដូច្នេះហើយទើបក្រសួងប្រៃសណីយ៍ និងទូរគមនាគមន៍ (MPTC) បានបង្កើតនូវកម្មវិធីបកប្រែភាសាមួយឈ្មោះថា «TranslateKH» គឺជាវេបសាយ និងជាប្រព័ន្ធកម្មវិធីបកប្រែអត្ថបទដ៏ទំនើបមួយ ដែលត្រូវបានបង្កើតឡើង និងគ្រប់គ្រងដោយ ក្រសួងប្រៃសណីយ៍ និងទូរគមនាគមន៍ (MPTC) ក្នុងគោលបំណងលើកកម្ពស់ការប្រើប្រាស់ភាសាខ្មែរក្នុងយុគសម័យឌីជីថល។ វេបសាយនេះត្រូវបានអភិវឌ្ឍឡើងដើម្បីសម្រួលដល់ការផ្លាស់ប្តូរព័ត៌មាន និងការទាក់ទងគ្នាដោយរលូនរវាងភាសាខ្មែរ និងភាសាអង់គ្លេស។

វេបសាយនេះប្រើប្រាស់នូវបច្ចេកវិទ្យាបញ្ញាសិប្បនិម្មិត (AI) និងម៉ាស៊ីនបកប្រែភាសាកម្រិតខ្ពស់ ដែលអាចយល់ពីបរិបទនៃអត្ថបទបានយ៉ាងល្អ ជំនួសឱ្យការបកប្រែពាក្យនឹងពាក្យបែបស្ដង់ដារចាស់ៗ។ វាធ្វើឱ្យការបកប្រែប្រយោគ ឃ្លា ឬអត្ថបទនានា ពីអង់គ្លេសទៅខ្មែរ និងពីខ្មែរទៅអង់គ្លេស មានភាពត្រឹមត្រូវ កាន់តែធម្មជាតិ និងងាយយល់សម្រាប់អ្នកអាន។

ក្រៅពីការប្រើប្រាស់នៅលើវេបសាយផ្ទាល់ https://www.translate.kh/ ក្រុមការងារក៏បានពង្រីកការអភិវឌ្ឍជាទម្រង់កម្មវិធីនៅលើទូរសព្ទដៃ (Mobile App) ទាំងនៅលើប្រព័ន្ធ Android និង iOS ផងដែរ។ វេបសាយនេះគឺជាសមិទ្ធផលបច្ចេកវិទ្យាជាតិដ៏មានសារៈសំខាន់មួយ ក្នុងការជួយដល់មន្ត្រីរាជការ សិស្សានុសិស្ស អ្នកអាជីវកម្ម និងសាធារណជនទូទៅ ក្នុងការបំពេញការងារ ការសិក្សា និងការទាក់ទងគ្នាក្នុងសម័យកាលឌីជីថលនេះដោយឥតគិតថ្លៃ។