ឱ្យតែដល់រដូវក្ដៅ ម្ចាស់ផ្ទះភាគច្រើនតែងតែមានចម្ងល់ថា "ហេតុអ្វីអគ្គិសនីប្រើច្រើនជាងមុន?" តើពិតមែនទេដែលថាកុងទ័រដើរលឿនជាងមុនក្នុងខែក្ដៅ?
មកឈ្វេងយល់ពីមូលហេតុពិតប្រាកដ និងកត្តាសំខាន់ៗមួយចំនួនដែលធ្វើឱ្យការប្រើប្រាស់អគ្គិសនីកើនឡើងដូចខាងក្រោម៖
១. កត្តាអាកាសធាតុ និងដំណើរការរបស់ឧបករណ៍ នៅពេលសីតុណ្ហភាពខាងក្រៅឡើងខ្លាំង ឧបករណ៍អគ្គិសនីត្រូវធ្វើការធ្ងន់ជាងមុន៖
- ម៉ាស៊ីនត្រជាក់ និងទូទឹកកក៖ ត្រូវដំណើរការម៉ូទ័រ (Compressor) ស្ទើរតែជាប់រហូត ដើម្បីទាញសីតុណ្ហភាពឱ្យត្រជាក់តាមការកំណត់។ កាលណាសីតុណ្ហភាពខាងក្រៅកាន់តែក្តៅ ម៉ាស៊ីនត្រជាក់ និងទូទឹកកក កាន់តែស៊ីភ្លើងខ្លាំង។
- កង្ហារ៖ យើងច្រើនប្រើលេខធំៗ និងបើកចោលក្នុងរយៈពេលយូរ ដែលធ្វើឱ្យគីឡូអគ្គិសនីកើនឡើងតាមនោះដែរ។
- ម៉ូទ័របូមទឹក៖ តម្រូវការប្រើប្រាស់ទឹកសម្រាប់ស្រោចដំណាំ និងការងូតសម្អាតកើនឡើងទ្វេដង ធ្វើឱ្យម៉ូទ័រត្រូវបូមទឹកញឹកញាប់ជាងមុន។
២. ឧបករណ៍ខ្វះការថែទាំ ឬចាស់រអាក់រអួល ឧបករណ៍ដែលមិនបានលាងសម្អាត ឬថែទាំឱ្យបានត្រឹមត្រូវ ធ្វើអោយស៊ីភ្លើងខ្លាំងបំផុត៖
- ម៉ាស៊ីនត្រជាក់ដែលធូលីដីកកកុញ៖ ធ្វើឱ្យខ្យល់ចេញមិនស្រួល ម៉ាស៊ីនត្រូវប្រឹងខ្លាំង មិនងាយដល់សីតុណ្ហភាពកំណត់ ដែលនាំឱ្យស៊ីភ្លើងលើសកម្រិត។
- ទូទឹកកកបើកទ្វារញឹកញាប់ ឬ បិទទ្វារមិនជិត ៖ ធ្វើឱ្យខ្យល់ត្រជាក់ភាយចេញក្រៅ នាំឱ្យម៉ូទ័រដើរគ្មានឈប់សម្រាក។
ដំបូន្មានដើម្បីសន្សំសំចៃ៖
១. លាងសម្អាតម៉ាស៊ីនត្រជាក់ឱ្យបានទៀងទាត់ (យ៉ាងតិច ៦ខែម្តង)។
២. កំណត់សីតុណ្ហភាពម៉ាស៊ីនត្រជាក់ត្រឹម ២៥°C។
៣. បិទឧបករណ៍អគ្គិសនីពេលមិនចាំបាច់។
"ប្រើប្រាស់អគ្គិសនីដោយឆ្លាតវៃ ជួយកាត់បន្ថយការចំណាយ និងធានាសុវត្ថិភាពគ្រួសារលោកអ្នក!"
