នៅថ្ងៃទី ១១ ខែសីហា ឆ្នាំ២០២៦ ក្រុមហ៊ុនអវកាសវៀតណាម VinSpace Joint Stock Company ដែលជាក្រុមហ៊ុនក្នុងប្រព័ន្ធ Vingroup បានប្រកាសថា ខ្លួនបានចុះកិច្ចសន្យាជាមួយក្រុមហ៊ុនអវកាសអាមេរិក SpaceX ដើម្បីបញ្ជូនផ្កាយរណបរបស់ខ្លួនទៅកាន់គន្លងអវកាសនៅឆ្នាំ ២០២៧។ តាមកិច្ចព្រមព្រៀង ផ្កាយរណបនឹងធ្វើដំណើរតាមបេសកកម្ម Transporter Rideshare របស់ SpaceX ដែលអនុញ្ញាតឱ្យអតិថិជនជាច្រើនចែករំលែកការបាញ់បង្ហោះតែមួយ ដើម្បីកាត់បន្ថយថ្លៃដើម និងធ្វើឱ្យការចូលទៅកាន់អវកាសកាន់តែងាយស្រួលសម្រាប់ផ្កាយរណបខ្នាតតូច។
គោលបំណងសំខាន់របស់ VinSpace គឺមិនមែនគ្រាន់តែបញ្ជូនផ្កាយរណបទៅអវកាសប៉ុណ្ណោះទេ ប៉ុន្តែដើម្បី សាកល្បងបច្ចេកវិទ្យាដែលក្រុមហ៊ុនបានអភិវឌ្ឍដោយខ្លួនឯងនៅក្នុងគន្លងអវកាស ពង្រឹងសមត្ថភាពវិស្វកម្មផ្កាយរណប និងបង្កើតមូលដ្ឋានសម្រាប់ការប្រើប្រាស់បច្ចេកវិទ្យាអវកាសក្នុងវិស័យពាណិជ្ជកម្មនាពេលអនាគត។ VinSpace នឹងទទួលខុសត្រូវលើការស្រាវជ្រាវ អភិវឌ្ឍ ផលិត និងប្រតិបត្តិការផ្កាយរណបក្រោយពេលបញ្ជូនទៅកាន់គន្លង។ ក្រុមហ៊ុនក៏មានគោលដៅកសាងសមត្ថភាពពេញលេញ ចាប់ពីការរចនា និងផលិតផ្កាយរណប រហូតដល់ការធ្វើតេស្ត ការគ្រប់គ្រងបេសកកម្មបាញ់បង្ហោះ ប្រតិបត្តិការផ្កាយរណប និងផលិតផលទិន្នន័យអវកាស។
ចំពោះដើមទុនវិញ សារព័ត៌មាន Reuters រាយការណ៍ថា VinSpace ត្រូវបានបង្កើតឡើងជាមួយដើមទុនដំបូងប្រមាណ ៣០០ ពាន់លានដុងវៀតណាម ដែលស្មើប្រហែល ១១-១១.៤ លានដុល្លារអាមេរិក។ ក្រុមហ៊ុននេះជាផ្នែកមួយនៃ Vingroup ហើយការបង្កើត VinSpace ស្ថិតក្នុងផែនការពង្រីកសមត្ថភាពបច្ចេកវិទ្យារបស់ក្រុមហ៊ុនទៅកាន់វិស័យអវកាស។
តាមការប្រកាសរបស់ក្រុមហ៊ុន កិច្ចសន្យានេះគឺជាជំហានសំខាន់ក្នុងការជំរុញឱ្យវៀតណាមមាន សមត្ថភាពអវកាសដែលអាចអភិវឌ្ឍ និងគ្រប់គ្រងដោយខ្លួនឯងបានកាន់តែច្រើន ព្រមទាំងជួយបណ្តុះបណ្តាលធនធានមនុស្សផ្នែកអវកាស និងពង្រីកកិច្ចសហប្រតិបត្តិការអន្តរជាតិ។ VinSpace បានប្រកាសផែនការអភិវឌ្ឍ និងបញ្ជូនផ្កាយរណបដំបូងរបស់ខ្លួនទៅកាន់គន្លងតាំងពី ខែមេសា ឆ្នាំ២០២៦ ហើយកិច្ចព្រមព្រៀងជាមួយ SpaceX នៅថ្ងៃទី ១១ សីហា គឺជាការធ្វើឱ្យផែនការនោះកាន់តែមានភាពច្បាស់លាស់ផងដែរ។
