យោងតាមអនុក្រឹត្យស្ដីពីការដាក់អោយអនុវត្តពន្ធគយលើទំនិញនាំចូលពីអាមេរិកដែល ចេញសេចក្ដីប្រកាសដោយរាជរដ្ឋាភិបាលកម្ពុជា កាលពីព្រឹកថ្ងៃសុក្រទី ០៨ ខែសីហា ២០២៥ នេះបានអោយដឹងថា រថយន្តដែលនាំចូលពីប្រទេសផ្សេងមកកាន់ទីផ្សារអាមេរិក កំពុងមានវត្តមានចរាចរណ៍នៅទឹកដីអាមេរិក ឬក៏រថយន្តមានដើមកំណើតនៅប្រទេសផ្សេងតែមានរោងចក្រផលិតនៅអាមេរិក គឺមិនទទួលបាននូវការអនុគ្រោះពន្ធ ០ ភាគរយ សម្រាប់ការនាំចូលមកកាន់ទីផ្សារប្រទេសកម្ពុជាឡើយ ពោលគឺរថយន្តដែលទទួលបាននូវការអនុគ្រោះពន្ធ ០ ភាគរយ ដាច់ខាតគឺជារថយន្តដែលមានដើមកំណើតនៅអាមេរិក និងជាប្រភេទរថយន្តថ្មីខ្លាញ់គោ ។ ហើយសម្រាប់រថយន្តមួយទឹកធម្មតាក៏មិនទទួលបាននូវការអនុគ្រោះពន្ធ ០ ភាគរយដែរ ។
ប៉ុន្ដែដោយយោងទៅតាមប្រសាសន៍ឯកឧត្ដម គុណ ញឹម រដ្ឋមន្រី្តប្រតិភូអមនាយករដ្ឋមន្ដ្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាក្នុងកិច្ចប្រជុំផ្សព្វផ្សាយ ស្ដីពីការអនុវត្តពន្ធគយលើទំនិញនាំចូលពីសហរដ្ឋអាមេរិក បានលើកឡើងថា “ រថយន្តថ្មីដែលបានផលិតនៅសហរដ្ឋអាមេរិចកនាំចូលមកកាន់កម្ពុជា គឺទទួលបាននូវការអនុវត្តពន្ធគយ ០ ភាគរយ តែសម្រាប់រថយន្តមួយទឹកឬរថយន្តដែលប្រើប្រាស់រួចចាប់ពី ៥ ពាន់គីឡូម៉ែត្រគឺមិនអាចទទួលបាននូវការអនុគ្រោះពន្ធគយ ០ ភាគរយឡើយ ” ។
ក៏ប៉ុន្ដែមានរថយន្តមួយទឹកប៉ុន្មានប្រភេទនេះគឺអាចទទួលបាននូវការអនុគ្រោះពន្ធ ០ ភាគរយគឺ៖
១. ជារថយន្តអាមេរិចដែលប្រើប្រាស់ក្រោមរយះចម្ងាយ ៥០០០ គីឡូម៉ែត្រ
២. ជារថយន្តអាមេរិចដែលផលិតត្រឹមឆ្នាំ ២០២៤ ឬ ២០២៥
៣. ជារថយន្តដែលមិនមានប្រវត្តិបុកប៉ះ ឬធ្លាប់ជួសជុល
ខាងក្រោមនេះជាឧទាហរណ៍នៃស៊េរីម៉ូឌែលឡានជាក់ស្តែង៖
- Ford៖ Ford F-150 Raptor R, Ford Bronco, Ford F250 , Ford Mustang, Ford Maverick, Ford Transit
- Jeep៖ Jeep gladiator, jeep Wrangler, jeep grand Cherokee, jeep Sahara, jeep Mojave
- Ram៖ Ram TRX , Ram 1500 , Ram rebel, Ram 2500
- Dodge៖ Dodge Challenger, Dodge charger, Dodge Durango…និងផ្សេងៗទៀតដូចដែលបានរៀបរាប់ពីលក្ខខណ្ឌខាងលើ។
គូសបញ្ជាក់ផងដែរថា ខណៈពេលដែលនាំចូលមកកាន់ប្រទេសកម្ពុជា អ្នកដែលនាំចូលត្រូវសម្អាងថាជាដើមកំណើតនៃទំនិញ តាមទម្រង់ និងវិធីដែលកំណត់ដោយ អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ។
