យោងតាមសារព័ត៌មាន Vietnamnet Global បានប្រាប់ឲ្យដឹងថា នៅថ្ងៃទី ២៧ ខែមីនា ឆ្នាំ២០២៥ សមត្ថកិច្ចបានទទួលពាក្យបណ្តឹងព្រហ្មទណ្ឌពីអ្នកស្រី ល.ធី.វី (កើតឆ្នាំ ១៩៦៣ រស់នៅក្រុងហាជុង ស្រុកហាជុង) ដែលបានរាយការណ៍ថា មានជនម្នាក់ក្លែងខ្លួនជាសាច់ញាតិបានទាក់ទងមកគាត់តាមរយៈ Facebook ហើយបោកបញ្ឆោតឱ្យគាត់ផ្ទេរប្រាក់ជាច្រើនចេញពីកុងធនាគារ។

ដោយទទួលស្គាល់ថា ករណីនេះជាទម្រង់នៃការឆបោកតាមប្រព័ន្ធអ៊ីនធឺណិត សមត្ថកិច្ចនគរបាលព្រហ្មទណ្ឌបានបើកការស៊ើបអង្កេតជាបន្ទាន់។ ក្នុងរយៈពេលបួនថ្ងៃបន្ទាប់ពីទទួលបានពាក្យបណ្តឹង ដោយការឆែកឆេរលំនៅដ្ឋានរបស់ពួកគេបានរកឃើញទូរស័ព្ទដៃចំនួន ៤ គ្រឿង iPad ១ គ្រឿង កុំព្យូទ័រលើតុ ១ គ្រឿង និងប្រាក់សុទ្ធ ២៣៥ លានដុង (ប្រហែល ៩.៤០០ ដុល្លារអាមេរិក)។

នៅប៉ុស្តិ៍នគរបាល ជនសង្ស័យបានសារភាពថា ពួកគេបានស្រាវជ្រាវតាមអ៊ិនធឺណិតពីរបៀបបោកបញ្ឆោតជនរងគ្រោះដោយបង្កើតប្រវត្តិរូប Facebook ក្លែងក្លាយរបស់ប្រជាជនវៀតណាមដែលរស់នៅ និងធ្វើការនៅបរទេស។ បន្ទាប់មកពួកគេបានប្រើគណនីក្លែងក្លាយទាំងនេះដើម្បីទាក់ទងសាច់ញាតិពិតប្រាកដរបស់បុគ្គលទាំងនោះនៅវៀតណាម ដោយធ្វើពុតជាត្រូវការផ្ទេរប្រាក់ជាថ្នូរនឹងរូបិយប័ណ្ណបរទេស។

ដើម្បីអនុវត្តការបោកប្រាស់ ជនសង្ស័យបានទិញស៊ីមកាត និងទូរស័ព្ទដែលអាចបោះចោលបាន បន្ទាប់មកទាក់ទងជនរងគ្រោះរបស់ពួកគេ ដោយបញ្ចុះបញ្ចូលពួកគេឱ្យផ្ទេរប្រាក់ទៅគណនីធនាគារដែលផ្តល់ដោយក្រុមលាងលុយនៅលើ Telegram ។ ក្រៅពីករណីនៅថាញ់ហ័រ អ្នកទាំងពីរបានប្រព្រឹត្តិករណីបោកប្រាស់មួយផ្សេងទៀតនៅវួដឌិកវង់ហៅ ខណ្ឌកៅចើយ ទីក្រុងហាណូយ ដែលពួកគេបានបោកប្រាស់ជនរងគ្រោះម្នាក់ទៀតអស់ជិត ៣៥០ លានដុង (ប្រហែល ១៤.០០០ ដុល្លារអាមេរិក) និងអាជ្ញាធរកំពុងបន្តស៊ើបអង្កេត និងពង្រីកករណីនេះ។

គូសបញ្ជាក់ផងដែរថា ករណីបោកតាមអនឡាញនេះបានក្លាយជាប្រធានបទដ៏ក្តៅមួយដែលមានគ្រប់ទីកន្លែង និងទូរទាំងប្រទេស។ ក្នុងករណីនេះយើងគួរបង្ការទុក និងដឹងពីយុទ្ធសាស្រ្តទាំងនោះរបស់ជនឆបោក ជៀសវាងការបាត់បង់ទ្រព្យសម្បត្តិលុយកាក់នានា ព្រោះបច្ចុប្បន្ននេះបច្ចេកវិទ្យាកាន់តែទំនើប មនុស្សកាន់តែសេរីក្នុងការបោកតាមប្រព័ន្ធអនឡាញគ្រប់រូបភាព ដូច្នេះអ្នកទាំងអស់គ្នាគួរមានការប្រុងប្រយ័ត្នខ្ពស់ ទោះនៅកម្ពុជាយើងមិនទាន់មានករណីធំនេះកើតឡើងក៏ដោយ តែយ៉ាងណាក៏គួរបង្ការទុកតាមការប្រាប់ពីវិធីការពារខ្លួនពីការឆបោកអនឡាញតារយៈសារបង្ហោះរបស់ ក្រសួងប្រៃសណីយ៍ និងទូរគមនាគមន៍ កាលពីកន្លងទៅ។

អត្ថបទដោយ៖ ងួន ឃុនណា