កាលពីថ្ងៃទី ១៥ ខែ កក្កដា ឆ្នាំ២០២៦ កន្លងទៅនេះ Google បានប្រកាសធ្វើបច្ចុប្បន្នភាពដ៏គួរឱ្យភ្ញាក់ផ្អើលមួយនៅលើកម្មវិធី Google Vids ដោយអនុញ្ញាតឱ្យអ្នកប្រើប្រាស់អាចបង្កើត «តួអង្គក្លែងធ្វើ (Digital Avatar)» ដែលមានរូបរាង និងសំឡេងដូចខ្លួនឯងបេះបិទ។ អ្វីដែលអ្នកត្រូវធ្វើ គឺគ្រាន់តែផ្ញើរូបថតសែលហ្វីចំនួន ១ សន្លឹក និងទម្លាក់សំឡេងថតរបស់អ្នកចូលទៅក្នុងប្រព័ន្ធ រួចទុកភារកិច្ចឱ្យ AI ដើរតួ ឬធ្វើបទបង្ហាញនៅក្នុងវីដេអូជំនួសមុខ ដោយមិនចាំបាច់ឱ្យអ្នកមកឈរថតនៅមុខកាមេរ៉ាផ្ទាល់ឡើយ។
ក្រៅពីការបង្កើតតួអង្គ AI ក្រុមហ៊ុន Google ក៏បានដាក់បញ្ចូលម៉ូដែល AI ជំនាន់ថ្មីគឺ Gemini Omni ទៅក្នុងកម្មវិធី Vids នេះផងដែរ។ មុខងារនេះជួយឱ្យអ្នកផលិតវីដេអូបានកាន់តែលឿន និងងាយស្រួល តាមរយៈការវាយបញ្ជាជាអក្សរ រួមផ្សំជាមួយរូបភាពយោងដែលអ្នកចង់បាន។ លើសពីនេះ វាក៏ដើរតួជាជំនួយការកែសម្រួលវីដេអូកម្រិតខ្ពស់ ដែលអាចជួយផ្លាស់ប្តូរផ្ទៃខាងក្រោយភ្លាមៗ សារ៉េពន្លឺវីដេអូដែលថតតាមទូរសព្ទឱ្យកាន់តែមានគុណភាព និងអាចបន្ថែមស្ទីល ឬ Effects ប្លែកៗជាច្រើនទៀតទៅតាមតម្រូវការ។
ការវិវឌ្ឍដ៏ធំនេះ បានរុញច្រាន Google Vids ឱ្យដើរហួសពីមុខងារដើមរបស់ខ្លួន (ដែលគ្រាន់តែជាឧបករណ៍ជំនួយការធ្វើ Presentation នៅក្នុងការិយាល័យ) ក្លាយទៅជាប្រព័ន្ធផលិតវីដេអូដ៏ពេញលេញមួយ ។ តាមរយៈការដាក់បញ្ចូលវាទៅក្នុងកញ្ចប់ Google Workspace ក្រុមហ៊ុន Google កំពុងបង្ហាញគោលដៅច្បាស់លាស់ក្នុងការវាយលុកទីផ្សារអាជីវកម្ម សម្រាប់ការផលិតវីដេអូផ្សព្វផ្សាយផ្ទៃក្នុង ឬវីដេអូបណ្តុះបណ្តាលបុគ្គលិក ដែលធ្វើឱ្យវាក្លាយជាគូប្រជែងដ៏គួរឱ្យខ្លាចមួយរបស់កម្មវិធីល្បីៗដូចជា HeyGen, Synthesia និង Captions។
ទោះជាយ៉ាងណាក៏ដោយ ដើម្បីទប់ស្កាត់ការយកបច្ចេកវិទ្យានេះទៅប្រើប្រាស់ក្នុងផ្លូវខុស ឬការបង្កើតវីដេអូបន្លំរូបភាព Google បានដាក់ចេញនូវវិធានការសុវត្ថិភាពយ៉ាងតឹងរ៉ឹងបំផុត។ តួអង្គ AI Avatar អាចបង្កើតបានតែជាមួយរូបរាងពិតដែលភ្ជាប់ទៅនឹងគណនី Google របស់ម្ចាស់ដើមប៉ុណ្ណោះ ហើយវីដេអូដែលផលិតចេញមកទាំងអស់ នឹងត្រូវបង្កប់ដោយស៊ីលជលផលមិនមើលឃើញដើម្បីបញ្ជាក់ថាជាស្នាដៃរបស់ AI។ បច្ចុប្បន្ន មុខងារនេះត្រូវបានកម្រិតឱ្យប្រើប្រាស់តែសម្រាប់អ្នកមានអាយុចាប់ពី ១៨ ឆ្នាំឡើងទៅ និងស្ថិតក្នុងតំបន់មួយចំនួនដែលទទួលបានសិទ្ធិតែប៉ុណ្ណោះ។
