កាលពីថ្ងៃទី ២៩ ខែឧសភា ឆ្នាំ២០២៦ មហាជនជាច្រើនមានការព្រួយបារម្ភក្រោយទទួលបានសារតាមរយ: SMS មួយដែលនិយាយពីមូលនិធិគន្ធបុប្ផាកម្ពុជា ដែលជាលីងបរិច្ចាគតាមប្រព័ន្ធទូរស័ព្ទដៃ ខណៈដែលមានមហាជនជាច្រើនមិនហ៊ានចុចចូលលីងមួយនោះ ថែមទាំងលើកឡើងថាអាចជាលីងឆបោក (Scam) ឬយ៉ាងណា។
ដូច្នេះមហាជនមេត្តាជ្រាបជាដំណឹងដោយមូលនិធិគន្ធបុប្ផាកម្ពុជា បានចេញបកស្រាយលើករណីនេះ។
មូលនិធិគន្ធបុប្ផាកម្ពុជា បានសហការយ៉ាងជិតស្និទ្ធជាមួយនិយ័តករទូរគមនាគមន៍កម្ពុជា ដើម្បីធ្វើការផ្សព្វផ្សាយសារអំពាវនាវតាមរយៈប្រព័ន្ធទូរស័ព្ទចល័ត។ ការផ្ញើសារនេះមានគោលបំណងចម្បងក្នុងការអញ្ជើញ និងលើកទឹកចិត្តដល់បងប្អូនប្រជាពលរដ្ឋទាំងអស់ ចូលរួមបរិច្ចាគក្នុងយុទ្ធនាការ «១ ម៉ឺនរៀល ១ ម៉ឺននាក់» ប្រចាំឆ្នាំ២០២៦ ដើម្បីរួមចំណែកទ្រទ្រង់ដល់បេសកកម្មមនុស្សធម៌ដ៏ថ្លៃថ្លានៃការផ្តល់សេវាថែទាំសុខភាពដល់កុមារនៅកម្ពុជា។
គូសបញ្ជាក់ផងដែរថា លីង និងសារដែលបងប្អូនទាំងអស់គ្នាទទួលបានតាមរយៈ SMS នោះ គឺជាលីងដែលសុវត្ថិភាព និងអាចបរិច្ចាគបានធម្មតាមិនមានបញ្ហាអ្វីឡើយ។ ដូច្នេះកុំភ្លេចចូលរួមបរិច្ចាគទាំងអស់គ្នាណា ដើម្បីកុមារកម្ពុជា។
