នៅក្នុងព្រឹត្តិការណ៍​ដ៏​អស្ចារ្យមួយនេះ​ មានការ​ចូលរួមជាកត្តិយសពីសំណាក់​ គណអធិបតីរួម​មាន ឯកឧត្តម ជា វុទ្ធី អគ្គលេខាធិការ​នៃ​គណៈកម្មាធិការ​វិនិយោគ​កម្ពុជា​នៃ​ក្រុមប្រឹក្សាអភិវឌ្ឍន៍​កម្ពុជា និង​លោក Yu Jun (យូ ជុន) អនុប្រធាន​ក្រុមហ៊ុន Guangzhou Automobile Group Co., Ltd. រួម​ជាមួយ​នឹងវត្តមាន​លោក ណម តុង អគ្គនាយកនៃ​ក្រុមហ៊ុន TH Group និង​វត្តមានលោក ណម ហាវ នាយក​ប្រតិបត្តិ​ជាន់​ខ្ពស់​នៃ​ក្រុមហ៊ុន TH Group តំណាងស្ថានទូតចិនប្រចាំនៅកម្ពុជា វត្តមានអ្នកស្រី Zhong Jie ព្រម​ទាំង​សិល្បករ អ្នក​បង្កើតមាតិការ និង សារព័ត៌មានជាតិ និង អន្តរជាតិជាច្រើនផងដែរ។

នៅក្នុងសេក្តីថ្លែងសន្ទរកថាក្នុងកម្មវិធីចុះ​ហត្ថលេខា​លើ​អនុស្សារណៈ​យោគយល់ (MOU) មួយនេះគឺជាភាពជោគជ័យនៃការបណ្តាក់ទុនរួមគ្នារវាង TH Automotive Manufacturing Co., Ltd. និង GAC International Co., Ltd. គឺជាសក្ខីភាពនៃចក្ខុវិស័យវែងឆ្ងាយរបស់ថ្នាក់ដឹកនាំ TH Group ដែលប្តេជ្ញារួមចំណែកដល់កំណើនសេដ្ឋកិច្ចកម្ពុជា។ ការខិតខំប្រឹងប្រែងនេះគឺស្របតាមយុទ្ធសាស្ត្របញ្ចកោណរបស់រដ្ឋាភិបាល ក៏ដូចជាចក្ខុវិស័យជាតិសម្រាប់កម្ពុជាឆ្នាំ ២០៣០ និង ២០៥០។

នៅក្នុងគម្រោងវិនិយោគនេះផងដែរគឺមានទំហំទឹកប្រាក់ប្រមាណ ១៩ លានដុល្លារ ដោយរោងចក្រនេះនឹងត្រូវសាងសង់លើផ្ទៃដី ១១ ហិកតា នៅក្នុងខេត្តកំពង់ឆ្នាំង។ រោងចក្រនេះត្រូវបានរំពឹងថានឹងបង្កើតការងារ ចន្លោះពី ៤០០ ទៅ ៦០០ កន្លែង និងមានសមត្ថភាពផលិតរថយន្ត GAC ប្រចាំឆ្នាំពី ១០,០០០ ទៅ ១៥,០០០ គ្រឿង។

ឯកឧត្តម ជា វុទ្ធី អគ្គលេខាធិការនៃគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសាទរចំពោះកិច្ចសហប្រតិបត្តិការនេះ។ ឯកឧត្តមបានបញ្ជាក់ពីជំហររបស់រាជរដ្ឋាភិបាលក្នុងការលើកទឹកចិត្តដល់ក្រុមហ៊ុននានាឱ្យបណ្តាក់ទុនដំឡើងរថយន្តថ្មីនៅកម្ពុជា។ គោលបំណងសំខាន់នោះ គឺដើម្បីផ្តល់ជម្រើសសម្បូរបែបដល់ប្រជាជនកម្ពុជាក្នុងការប្រើប្រាស់រថយន្តថ្មី កាត់បន្ថយការពឹងផ្អែកលើរថយន្តជជុះ។

ចាប់តាំងពីឆ្នាំ ២០២០ មក GAC Cambodia ដែលជាក្រុមហ៊ុនក្រោមការគ្រប់គ្រងរបស់ TH Group បានក្លាយជាអ្នកនាំចូល និងចែកចាយផ្តាច់មុខនូវរថយន្ត និងគ្រឿងបន្លាស់ GAC នៅក្នុងប្រទេសកម្ពុជា។ នេះត្រឹមតែរយៈពេលជាង ៥ ឆ្នាំ ប៉ុណ្ណោះ ម៉ាកយីហោរថយន្ត GAC បានរីកចម្រើនយ៉ាងឆាប់រហ័សដែលនឹកស្មានមិនដល់។ គិតមកដល់ឆ្នាំ ២០២៥ នេះ GAC បានក្លាយជាម៉ាករថយន្តចិនមួយដែលឈានមុខគេមួយនៅក្នុងទីផ្សារកម្ពុជា និអន្តរជាតិផងដែរ។

ជារួមមកវិញក្រុមហ៊ុនទាំងពីរដែលជាដៃគូសហការគ្នាក្នុងគម្រោងរោងចក្រដំឡើងរថយន្តនៅកម្ពុជានេះ គឺ៖

១. ក្រុមហ៊ុន TH Automotive Manufacturing Co., Ltd.

ក្រុមហ៊ុននេះ​ គឺជាបុត្រសម្ព័ន្ធរបស់ TH Group ដែលជាក្រុមហ៊ុនពហុធុរកិច្ចឈានមុខគេមួយនៅកម្ពុជា។ គោលដៅចម្បងរបស់ក្រុមហ៊ុន TH Automotive Manufacturing Co., Ltd. គឺដើម្បីជំរុញឧស្សាហកម្មរថយន្តនៅកម្ពុជា តាមរយៈការបង្កើតភាពជាដៃគូយុទ្ធសាស្ត្រ និងការផលិតក្នុងស្រុក។

២. ក្រុមហ៊ុន GAC International Co., Ltd.

ក្រុមហ៊ុននេះ គឺជាក្រុមហ៊ុនបុត្រសម្ព័ន្ធអន្តរជាតិរបស់ក្រុមហ៊ុនមេ Guangzhou Automobile Group Co., Ltd. ដែលជាក្រុមហ៊ុនផលិតរថយន្តដ៏ធំមួយរបស់ប្រទេសចិន។ ក្រុមហ៊ុន GAC International Co., Ltd. មានចក្ខុវិស័យពង្រីកវត្តមានរបស់ខ្លួន និងបង្កើនសមត្ថភាពផលិតរថយន្តនៅតាមទីផ្សារអន្តរជាតិនានា។

គូសបញ្ជាក់ផងដែរថា ការ​បង្កើត​រោងចក្រ​ដំឡើង​រថយន្ត GAC បើក​ទំព័រ​ថ្មី​មួយ​សម្រាប់​ឧស្សាហកម្ម​រថយន្ត​របស់​កម្ពុជា និង​ក្រុម​ហ៊ុន TH Group ជា​ដៃគូ​យុទ្ធសាស្ត្រ​ដ៏​រឹងមាំ និង​គួរ​ឱ្យ​ទុក​ចិត្ត​សម្រាប់ប្រទេសចិន និង ក្រុមហ៊ុន GAC ដែល​ធ្វើ​ឱ្យ​កេរ្តិ៍ឈ្មោះ​របស់​ម៉ាក​យីហោ​នេះ​កាន់តែ​រឹងមាំ​សម្រាប់​ពេល​អនាគត។