បេសកកម្មដែលប្រើពេល ៥ ឆ្នាំនេះ ត្រូវបានអនុវត្តដោយឧបករណ៍វិភាគពន្លឺថាមពលងងឹត ឬហៅកាត់ថា DESI (Dark Energy Spectroscopic Instrument) ដែលបំពាក់នៅលើតេឡេស្កុប Nicholas U. Mayall ក្នុងរដ្ឋ Arizona សហរដ្ឋអាមេរិក។ យោងតាមរបាយការណ៍បានឱ្យដឹងថា គម្រោងនេះបានបញ្ចប់មុន កាលកំណត់ ថែមទាំងប្រមូលទិន្នន័យបានលើសពីការរំពឹងទុកដើមយ៉ាងច្រើន។ ជាលទ្ធផល ផែនទីនេះបានកំណត់ទីតាំងជាក់លាក់នៃកាឡាក់ស៊ី និងអង្គសិលាដែលមានពន្លឺខ្លាំង (Quasars) រហូតដល់ជាង ៤៧ លាន ដែលច្រើនជាងទិន្នន័យនៃគម្រោងមុនៗទាំងអស់បូកបញ្ចូលគ្នាដល់ទៅ ៦ ដង។

អ្វីដែលកាន់តែអស្ចារ្យនោះ ផែនទី 3D ថ្មីនេះអនុញ្ញាតឱ្យអ្នកវិទ្យាសាស្ត្រមើលឃើញរចនាសម្ព័ន្ធសកលលោកតាំងពីយុគសម័យដែលគេហៅថា Cosmic Noon ឬកាលពីប្រហែល ១១ ប៊ីលានឆ្នាំមុន។ វាបង្ហាញយ៉ាងច្បាស់នូវបណ្តាញសរសៃនៃសកលលោក Cosmic Web ដែលជាទីតាំងកាឡាក់ស៊ីរាប់លានបានប្រមូលផ្តុំគ្នា។ តាមរយៈទិន្នន័យនេះ ក្រុមអ្នកស្រាវជ្រាវសង្ឃឹមថានឹងអាចស្រាយអាថ៌កំបាំងនៃ ថាមពលងងឹត ដែលជាកម្លាំងអាថ៌កំបាំងដែលគ្របដណ្តប់ប្រហែល ៧០% នៃសកលលោក និងជាកម្លាំងដែលរុញច្រានឱ្យសកលលោកកាន់តែរីកសាយភាយលឿនទៅៗ។

ទោះបីជាផែនទីដែលបានគ្រោងទុកដំបូងត្រូវបានបញ្ចប់ក៏ដោយ ប៉ុន្តែដោយសារប្រសិទ្ធភាពខ្ពស់នៃឧបករណ៍ DESI ក្រុមការងារបានសម្រេចចិត្តបន្តការសង្កេតរហូតដល់ឆ្នាំ ២០២៨។ ការបន្តនេះនឹងពង្រីកវិសាលភាពផែនទីឱ្យកាន់តែធំជាងមុន ២០% បន្ថែមទៀត ដែលនឹងផ្តល់នូវទិន្នន័យកាន់តែលម្អិត និងស៊ីជម្រៅអំពីប្រភពដើម ក៏ដូចជាអនាគតនៃមហន្តរាលសកលលោកដែលយើងកំពុងរស់នៅ។

គួរបញ្ជាក់ផងដែរថា លទ្ធផលដំបូងនៃការវិភាគទិន្នន័យពេញលេញនៃរយៈពេល ៥ ឆ្នាំនេះ ត្រូវបានរំពឹងថានឹងចេញផ្សាយជាផ្លូវការនៅឆ្នាំ ២០២៧ ខាងមុខ ដែលវាអាចនឹងធ្វើឱ្យមានការផ្លាស់ប្តូរការយល់ដឹងជាមូលដ្ឋានរបស់មនុស្សជាតិអំពីច្បាប់រូបវិទ្យានៃសកលលោកទាំងមូល។